XUV　高人一等

XUV　高人一等

男男女女不論是國色天香還是平庸之輩，都總會想高多兩吋，身形夠高䠷，着任何衫會靚啲。唔止身材，車有時都好需要高多兩吋，上壆、走山路都無咁易刨下巴，定位介乎SUV與旅行車之間嘅Saab9-3X，稱為XUV，懸掛增高了35毫米，令高人一等的旅行車得以輕鬆路路通，卻又不失房車的斯文氣派。

記者：許維雅　
攝影：陳陶鈞
Model：Hailey@GME

兼備SUV的安全穩定

瑞典品牌Saab名氣不及德國車廠，車款設計亦向來比較偏離主流，正因如此，強烈的自我風格往往令人留下深刻印象，好似早前新推出的9-5，串連整個車尾的尾燈組合設計就令我一見難忘。今次新上場的9-3X同樣非我族類，09年於日內瓦車展首亮相，定位為XUV，即係SUV與旅行車的Crossover版本，如當年AudiA6Allroad，不過現今已經無乜同類型車款。
驟眼睇只係一架大尾旅行車，但9-3X的底盤其實調高了35毫米，令1,576毫米高的車身比起一般旅行車稍高，配合瑞典Haldex開發的第四代全時四驅系統，透過速度及轉向的電子監測，會因應路面不同狀況自動分配前後軸及兩個後輪之間的扭力，為旅行車帶來SUV的穩定性及抓着力，最適合愛戶外活動又唔喜歡揸SUV的男士。加上Saab專利的eLSD電子限滑差速器配合，防止於濕滑路面出現輪胎打滑的情況，9-3X旅行車有着極佳的安全性。

■天窗屬標準配備，切合9-3X的戶外形象。

■1,331公升尾廂儲物空間輕鬆放得落一把長梯。

■紳寶一貫的內櫳鋪排，似乎有點欠新意。

■Bose音響Subwoofer收藏於尾廂下層。

■2公升Turbo引擎可於低轉時輸出強勁300Nm扭力。

■車尾同樣有金屬沙板作保護，換來SUV味道。

■軚環加減波設計同樣另類，置於按鈕上方。

■NightPanel夜用儀錶功能及動感模式掣置於中控右上方。

車身高上壆易

為了配合XUV輕微升高了的車身，車身前後都加裝了StoneGuard金屬沙板作保護，前後及兩側亦有黑色膠沙板包圍，不單止有一定實際保護作用，令外形上亦多添幾分SUV的味道。雖然9-3X唔會有真正的越野能力，但以高多吋半的旅行車來應付舊式停車場較深的上落斜、被迫將車駛上壆等人的場面，一定唔怕有膽戰心驚架車危危乎唔夠過的尷尬場面。

■底盤升高了35毫米，令車身較一般旅行車高。

■上石壆時，車頭下巴跟地面還有一段距離。

特大尾廂　配備足

另一最吸引的地方就係它的特大尾廂，摺合後座前已經有477公升，摺合後排座椅後可變成2.5米長、1,331公升的儲物空間，戶外活動時放單車定滑浪板都綽綽有餘。雖然9-3X最令人失望就係中控台及錶板的設計有點兒簡陋過時，但慶幸它的配備都十分足料，天窗、電椅、藍芽、軚環加減波及LED日間行車燈等統統都有齊，配備10個揚聲器的Bose音響系統就連Subwoofer都跟埋，確實相當少見，為車主帶來一流的聽覺享受。

■後座放腳位置偏窄，但慶幸頭頂空間感十足。

Saab9-3X

引擊：1,998cc直四Turbo
馬力：210bhp/5,300rpm
扭力：300Nm/2,500rpm
傳動：6前速自動Sentronic
售價：$498,000
查詢：27608668（SaabHK）