識飲識食的人氣名廚幟哥（黃永幟），繼近日被傳拍攝《為食總司令》時對拍檔高海寧嗒糖後再惹是非，有消息指幟哥自恃人氣升而事事自把自為，在未知會無綫情況下私自邀地產高層老友擔任《為食》嘉賓，藉節目為自己的飲食王國打好關係，結果觸怒無綫高層，將他飛出飲食節目主持之列。
現年52歲名廚兼飲食集團主席黃永幟為無綫主持的飲食節目《為食總司令》，去年播映叫好又叫座，無綫遂邀幟哥再開拍第二輯並於今年6月推出。不過，節目播映以來卻是非不斷，有指幟哥對拍檔高海寧嗒糖而冷待陳庭欣，而節目中跟高海寧在越南齊穿比堅尼浸泥漿溫泉而成為網民熱話的「豬扒港姐」陳庭欣，更遭網民狂踩懶音多兼經常搶對白。
唔講唔知，原來《為食》今年初到越南和馬來西亞拍攝外景時，幟哥已多次跟無綫幕後炒大鑊，有傳幟哥自恃人氣升而自把自為兼益自己友，藉節目為自己飲食王國打關係。
改期就老友浪費資源
據知情人士透露：「幟哥拍第二輯嘅態度同第一輯係180度變晒，去越南同大馬拍外景，佢成日要人拍佢自己啲老友。有次佢約好咗個嘉賓，隊crew去到現場個嘉賓甩底，導演唔想浪費公司資源，建議即刻搵第二個嘉賓頂上，點知幟哥堅持唔搵第二個拍，導演最後都肯順從佢意思，改喺第日再拍佢老友，但咁做法已經白白浪費人手資源啦！最慘係幟哥好唔滿意個導演下下窒住晒，返到香港之後，要無綫即刻換過個導演，要脅無綫話唔換導演嘅話佢就唔拍，無綫為咗息事寧人，咪惟有換導演囉。」
知情人士續說：「最尾一集係喺間酒家搵一大班嘉賓出席，點知幟哥喺冇通知TVB情況下，搵咗某地產公司租務高層出鏡，導演唔肯拍，佢就即刻發脾氣走人話唔拍，搞到一鑊泡。監製賴偉棠知道之後猛同幟哥講數，大概半粒鐘之後，幟哥先至肯再返去現場繼續拍攝，佢個地產高層老友當然冇得出鏡啦。」
李寶安傳召監製問話
據悉，有關幟哥藉無綫節目為自己飲食王國打關係風波，事件驚動了集團總經理李寶安，令他大感不滿，除勒令以後不要再找幟哥主持飲食節目外，原本節目再添食兩集即共17集的計劃，無綫也即時喊停，提早結束。
就無綫不滿幟哥自把自為一事，無綫外事部副總監曾醒明昨回應說：「事件向製作部了解過，係小風波、小誤會，拍攝《總司令》去到現場，幟哥有個租務朋友喺現場，幟哥話請埋佢出鏡，但按TVB規矩，出鏡嘉賓事前要經製作部會議通過先拍攝。工作人員去到現場見嘉賓唔喺拍攝之列，婉拒拍攝嗰位嘉賓，幟哥都好明白。至於傳到去李寶安先生度，係因為李生收到報告，佢純粹邀請賴偉棠了解啫，唔係責難。幟哥同TVB合作好多年，互相尊重，今次只係少少溝通上誤會啫，唔影響將來合作。」
不滿導演亂闖乳豬廠
記者昨日致電幟哥了解，對邀自己友任嘉賓，幟哥否認說：「冇咁嘅事，喺越南同馬來西亞嘅嘉賓全部經TVB安排，我私下冇搵過任何一個嘉賓。」何以忽然換導演？他說：「我哋拍乳豬廠，要好嚴格衞生程序先可以拍，間廠係政府嘅，政府安排咗個副市長接待，佢（導演）一入到間廠話：『我唔需要見呢啲人。』之後自己衝入去廠睇景。政府咁樣招待你，你都唔打個招呼，對我哋拍攝情況係有問題o架喎！佢唔跟人哋衞生程序，又唔戴口罩，個廠長捉住我投訴，所以我要求換人。」
問到未經無綫同意邀地產高層老友出鏡，幟哥解釋說：「嗰日個經理上嚟飲茶，佢睇我哋拍嘢，我就叫佢試吓（出鏡），佢又好識食，味覺好敏銳，食嘢方面畀好多意見我，我話佢咁識講嘢，不如坐喺度講畀我哋聽。但導演話要報TVB，我打畀賴生（賴偉棠），賴生話唔得，唔得咪由佢囉！就係咁之嘛。」聞說無綫極感不滿要cut兩集，及下令不再找他講飲講食。幟哥說：「拍完之後賴生話仲想拍多兩集，諗住去泰國，但後尾佢話冇期，個期要擺港姐同《福祿壽放暑假》。我早幾晚撞到方小姐，佢不知同我幾好傾，邊有不和！TVB仲叫我諗定明年節目㖭！邊有問題！」近日有指幟哥對高海寧嗒糖並冷待陳庭欣，他說：「仲無稽，全程我老婆跟住！」記者曾致電《為食》監製賴偉棠，但至截稿前未獲回覆。
採訪：林妃