母校上周傳來一個電郵，是邀請校友們參加9月份的陸運會。既驚且喜，因為很想參加但一點預備也未有，就如當年返緊學時，臨瞓前諗起明朝要測驗，而自己一如以往冇溫過書，那種膽戰心驚的感覺，到社會工作後好像都未試過了。但能夠見番老師與同學仔，仍然是一大原動力，餘下一個月努力練跑吧。
想當年的甜酸苦辣，很奇怪，當年越辣的記憶，卻可能是最深刻的，而味道也有點由辣變了甘甜。教過自己的多位老師，好人的太多，偏心自己的也不少，偏偏最深印象的卻是那位一臉嚴肅、嘴巴永遠不會向上翹的訓導主任吳sir。
初中自己太壞了，留堂是家常便飯，原因不離遲到、早退、上堂瞓覺、無交功課、肅靜時嘈喧巴閉等等，所以每次見到吳sir，都總是冇乜好嘢，自不然會閃縮埋一邊；就如出街見到警察，但冇帶身份證一樣。
直到中四那年，吳sir本着「周處除三害」態度，竟然委派我這名大惡人做風紀，結果是督促了自己不敢造反，乖乖的做了一個好學生。而吳sir這一年非但沒有罰過我，兼且還在同學面前誇獎了我一次，因為我為糾察隊連日趕工，做了一幅尚算精美的海報，還記得吳sir那次向着我咧嘴而笑時，我發現原來他都幾靚仔。
藉軍訓練出成績
春風化雨做教育是一門不簡單的學問，做好人自然受歡迎受愛戴，但對年輕人來說，一個嚴肅的訓示、一次認真的責罰反而會令他們深刻體會自己的責任與錯對。
當然，有得揀的話，應該沒有人會揀黑面神做自己老師，但換轉在球壇，大家都有眼睇，「淋善」的領隊永遠沒有好前途，表面可能關係好，實際球員當你冇到……
韋斯咸今晚英冠開打，雖然降Grade了，但卻非常的有希望，因為終於找了個訓導主任BigSam來帶隊，有望以軍訓練出成績。至於以往的幾位好好人的領隊：格蘭、蘇拿、古比士利等等，還是做朋友好過。
文：keyman