先施錶行（444）有祖國豪客支持，生意繼續肥仔水，股價再跌，好。先施錶行主打FranckMuller呢家高檔品牌嘅中、港、澳及台灣手錶及配飾獨家分銷代理。集團2011年度（3月底止）嘅純利，就一支箭飆升咗15倍到7880萬銀，家陣PE講緊得8倍水位，場裏面高檔品牌鐘錶股，全部12倍過外，先施錶行已經夠晒吸引。再講，集團主打嘅高檔品牌，又受祖國大款歡迎。講高消費力，祖國富豪夠晒實力，先施錶行食住呢條水，繼續肥仔水。唔好估多，集團2012年度純利，係咁易翻半番到1.18億元，預期PE跌到得番5.6倍，漏晒口水。呢轉先施錶行再跌，到1.5元撈一轉，集團股價上番兩蚊，潛在回報率33%，預期PE10倍都未夠。
NAV折讓四成敲廣南
廣南（1203）今年以嚟累積跌咗40%，又貼近1年低位。而集團現價（1.22元）NAV折讓38%，PB得0.62倍。唔計08年插得特別深嘅海嘯價，廣南呢個PB水位，已經跌到過去10年平均最低價位所計嘅PB水平，廣南殘到痹。呢轉廣南再跌，挨近1.15元先嚟轉短打，博集團升20%到1.38元，廣南仲未有耐上到NAV水平。
錢雋