法國度假勝地St.Tropez近日星光處處，繼名模姬蒂摩絲（KateMoss）半裸晒腩玩跳水後，英國樂壇大姑媽艾頓莊（EltonJohn）昨日亦抱住七個月大的囝囝Zachary，聯同電影《藍精靈》（TheSmurfs）的同志男星NeilPatrickHarris和他的另一半DavidBurtka，拉隊搞親子船P，四個男人湊仔功純熟，更識得幫三個B穿救生衣，場面十分溫馨！
老友見面傾唔停
年屆64歲的艾頓莊和伴侶大衞芬尼斯（DavidFurnish）一向恨有小朋友恨到發燒，去年聖誕節終如願以償透過代母誕下兒子Zachary。自此艾頓莊便將囝囝視作金叵羅，不但經常唱搖籃曲，更要求囝囝的生母無論身處何地，都要速遞新鮮母乳給囝囝，努力讓囝囝在健康的環境下成長。
昨日艾頓莊被偷拍到現身法國度假勝地St.Tropez的Club55享受天倫樂，他做發起人請來一大班朋友出海與陽光玩遊戲，當中包括電影《藍精靈》的同志男星Neil和他的另一半David，以及他們那對同樣由代母所生的孖B，正好可以與Zachary做伴，同行還有大批保母及保鑣等，認真大陣仗。
雖然天氣炎熱，但現場所見艾頓莊似乎不怕熱，穿上黑色衫與伴侶大衞帶住寶貝仔Zachary現身碼頭。已經七個月大的Zachary由大衞抱住，他穿上襯到絕的間條衫仔，跟艾頓莊更有如餅印，眼仔睩睩四圍望，十分可愛。至於育有一對龍鳳胎的Neil，則與同志伴侶David分工合作一人抱一個到場，四個男人一見面就吹水傾湊仔經，氣氛愉快。
開船B仔嚇到喊
準備落船之際，艾頓莊等人都十分細心，幫三個未夠一歲的BB做足安全措施穿上救生衣，不過BB年紀實在太細，一開船即刻嚇到喊，好彩Neil湊仔經驗豐富，即刻對B仔又呵又錫。眾人之後在船上玩到癲，Neil和伴侶更赤裸上身躺在甲板上曬太陽。
大批泳客收到風知道艾頓莊出海搞船P，於是趁他們玩完落船時，擠在碼頭兩旁舉機影相，搞到艾頓莊等人有如巨星出巡行天橋，場面搞笑。