「蜜蜂兵團」餓食「漢堡」響頭炮！衞冕的多蒙特周五在主場西法倫球場上演的德甲揭幕戰，在80,720名全場爆滿的球迷見證下，以3:1擊敗漢堡，為蟬聯之路打支強心針。日本中場香川真司雖然沒有入球，但全場表現搶鏡，比賽期間多蒙特球迷更不斷高唱其名字「Kagawa……Shinji……」。
經過漫長的暑假，「餓波」已久的多蒙特球迷周五終可將儲下來的精力，一次過於西法倫球場與8萬多人一起發洩出來。賽事雖於當地晚上8時30分舉行，但「蜜蜂兵團」及客軍漢堡的球迷早於開賽前數小時已在場外守候，三五知己把酒談心講波經，到球會專門店買紀念品的也絡繹不絕；主隊球迷但凡見到亞洲臉孔，更會大叫甚至高唱日本中場香川真司的名字，氣氛一流。現場所見，確實有不少日本球迷入場，果然是香川真「堅」！
助攻助守領軍贏3:1
由於今仗是德甲的揭幕戰，賽前先安排開幕典禮。逾百名身穿白衫白褲的工作人員走在一起，堆砌成一大型「火柴人」球員，再虛擬頂波入龍門，為新一季賽事揭開序幕，碧根鮑華等德國名宿皆有入場觀看。
隨着氣氛最好、站在南看台的多蒙特球迷高呼口號及大唱會歌，球賽正式開始，可惜賽事其中一個亮點，香川真司與漢堡的孫弘民的日、韓對決，因後者缺陣而失色。傷癒的香川依舊悅目，全場走上走落，助攻助守，當中包括一次射中柱的攻門，令在場球迷看得如癡如醉，不斷高唱「Kagawa……Shinji……」
哥斯基奧斯兩粒
不過，今仗的主角是德國小將哥斯基奧斯，先於上半場17分鐘接應之後為球隊射成2:0的馬里奧葛斯傳中球，打破僵局成為今屆德甲的首名入球得主；他隨後再於48分鐘梅開二度，為球隊鎖定勝局。幸今季有射手雲尼斯達萊離隊的漢堡，完場前有羅拔泰斯治乘對手後防混亂，「執雞」破蛋，卒以1:3落敗。多蒙特全軍賽後向球迷謝幕，成為贏波英雄的馬里奧葛斯賽後表示︰「有出色的教練，帶領我們這支年輕球隊，我們可造得更好！」
賽事結束近半小時，逾8萬球迷仍未能全面徹退，令街道大塞車。不過，贏波的多蒙特球迷依然亢奮，不斷響號打拍子，前呼後應，讓場內的熱情及喜悅充斥整個多蒙特。
《花絮》
着些路迪波衫博大霧
多蒙特有名叫做「蜜蜂兵團」，波衫主色就梗係黑黃色啦！周五8萬幾個球迷，大部份支持主隊嘅都係呢個look，真係有啲似一窩蜂湧入球場。睇真啲，呢兩位球迷（圖）着件同色系嘅蘇超些路迪球衣博大霧撐場，不過總好過着件死敵史浩克04嘅球衣入場。
串燒兄弟豪花30萬円追星
一睇玉田健太郎（左起）、高橋亮、菊地創、竹山和臣4位來自日本大和「80後」嘅清一色造型，就知佢哋入場捧同胞香川真司場啦！為咗捧偶像，佢哋每人足足用咗成30萬，講緊嘅當然係日元啦，但轉返港紙都要差唔多3萬蚊，追星真係要付出代價o架。
漢堡fans踩場未驚過
多蒙特周五一片「黃海」，有起事上嚟，作客嘅漢堡球迷都咪話唔驚。但Sabrina（右）同Jennifer兩母女就話冇有怕，事關佢話兩軍球迷不知幾friend，包保唔會有事。之不過佢哋遲遲未入場，皆因Sabrina老公去咗飲酒，如果飲大咗失散都幾頭痛。
球員樣啤酒杯做手信
靚女球迷Dana（右）周五同朋友專程喺法蘭克福過嚟捧多蒙特場，而喺德國睇波當然唔少得佢哋手上嘅啤酒。場內有間舖賣嘅酒杯上印有唔同球員嘅人像，飲完做手信或者留念都唔錯。呢兩位忠實擁躉話個個球員都鍾意，仲大讚亞洲之光香川真司係好球員。
