商台DJDonald（唐劍康）同雲海前晚喺柴灣演出《雲海．當奴．骷髏頭》棟篤騷，主要講鬼古，仲有人扮鬼行嚟行去嚇觀眾，其中有隻嚇親Donald，佢驚到講仆街。佢哋分享藝人嘅鬼故事，最恐怖算係何超儀嗰個，雲海話超儀有次喺摩星嶺拍戲，拍拍吓見到屋頂有三個小朋友，超儀同劇組人講，啲人叫佢唔好理，之後超儀返屋企，見到爐頭着咗火，但工人就話冇開火，佢熄火時發現爐頭係凍嘅，於是打畀雲海求救，雲海話超儀屋企原先已有嘢，仲帶埋摩星嶺嗰三件返去㖭。騷後雲海話冇知會超儀講單嘢出嚟，但相信佢唔會嬲。
成個騷最好笑係將廣告變成鬼古，Donald扮劉子千幫四洲拍嘅電視廣告，唱埋《唸你》，但當螢幕播四洲嘅標記時，佢就寫住「作曲：閻羅王，主唱：銀河戰士」，加埋啲氣氛，搞到全場爆笑。
嘲劉子千唱鬼歌
Donald仲話：「其實呢首係鬼歌，幾好聽。」佢又好激動鬧o靚模，要佢哋落地獄，好似第一層拔舌地獄，佢話：「啲o靚模搞是搞非，價值觀扭曲，搞到啲人以為唔使讀書，大就有嘢做，你話我假，我話你盡，全部一擔擔，頂你個肺。」