【本報訊】黑幫涉足殯儀行業，最近更想「連汁都撈埋」。專門替長生店做「駁腳」預訂火化爐的「火葬代理」，近期遭三大黑幫和勝和、14K及水房聯手敲詐，迫令他們每訂一個爐要繳交50元陀地費，黑幫想無本生利，每年穩賺逾百萬元。
記者：葉競科 陳兆剛
黑幫欲插足收陀地地點為長沙灣政府合署一樓九龍區火葬預定辦事處。有殯儀業人士透露，上址常有俗稱「火葬代理」排隊「訂爐」：「火化爐預約好緊張，手續又繁複，雖然市民可以自行申請，但大部份都係交畀長生店代辦。」他說，長生店以往會各自派遣職員排隊辦理，但很多時要凌晨便到場霸位，費時失事，當局又容許一人每次領5張籌，最後衍生出「火葬代理」這行業，每訂一個爐收取200元，「收費都算合理，業界都樂意幫襯」。
消息稱，現時約有4至5幫「火葬代理」，分別在灣仔及長沙灣的火葬預定辦事處搵食。「長沙灣政府合署內外其他殯儀嘅生意，都係由和勝和頭目『冬菇』、14K嘅『華生』，同埋水房嘅『麗閣朱』聯手掌控，要喺嗰度搵食都要佢哋批准。」火葬代理原本可自由搵食，但上月中，三大黑幫向他們放話，揚言火葬代理若要繼續在該處搵食，本月起每訂一個爐就要交50元陀地費。
一名火葬代理劉先生（化名）婉轉承認受到敲詐。「唉，我哋又唔係出嚟行，只係求兩啖飯食吓，對方話要收錢我哋可以點？雖然行家都好不滿，但無辦法啦，相信最後都要畀。」全港每日有203個火化爐配額，撇除殯儀館及骨灰龕親自派人訂爐外，至少有約80個是經火葬代理取得，從業員月入可達數萬元。
殯儀業不會轉嫁消費者
業內人士推算說：「若果黑幫成功收到呢筆陀地，以每個爐收50蚊、每日80個爐計，一個月穩袋成10萬蚊，一年穩賺過百萬。」他相信，黑幫最終目的是踢走火葬代理，壟斷每年接近500萬元的「代理訂爐費」。據悉，深水埗警區反黑組近日亦收到有關舉報，已作跟進。
有殯儀業人士表示聽過火葬代理被敲詐一事，明言不會因此將費用轉嫁消費者，「代理畀黑幫勒索應該循正途求助，若因為陀地費而要我哋加服務費，我哋最多唔幫襯，自己派人去排隊好過」。