MCStradale音樂廳　享男音

小學雞問題：花錢買車，究竟買四人車還是雙座車較抵呢？理性上梗係買四人車，一架車載晒一家大細，合乎經濟原則。不過買車這回事似乎沒理性可言，最重要係犧牲了兩後座換番乜嘢返嚟？瑪莎拉蒂的GranTurismoMCStradale，四變二後，馬力及扭力則相應提高，這樣可以戰勝你的理性嗎？

記者：趙慧敏
攝影：林栢鈞

跑味大增

於瑪莎拉蒂GranTurismo車系中，MCStradale價錢最貴，不過講實用性，似乎排隊尾，事關新款MCStradale為求減磅，減走後排兩座，不過空間仍在，如果睇唔慣後排空蕩蕩，大可加個防滾架，不過不難想像以GranTurismoMCStradale的豪氣配上防滾架，總有點格格不入之感。
無論如何，新款MCStradale確實是車系中少見擁有如此跑味的雙門跑車，單看外形，車身擁有結實肌肉線條，配上全新打造嘅啞黑擾流、沙板多組導風口、車尾大口徑排氣喉及底部熏黑的Bi-Xenon頭燈，都令車形泛着超濃辛辣味。

■在小路穿梭，猶如一輛白色悍馬。

■重新打造的擾流，辛辣味濃。

■車頭透氣網講究線條美。

■車尾配用大口徑雙出式排氣喉。

■熏黑的Bi-Xenon頭燈，為車形帶出氣勢。

轉檔敏銳

以GranTurismo為基礎而重新改裝的MCStradale，既以高性能房跑定位，搶眼位當然是性能，配上4.7公升V8引擎，雖較GranTurismoS高出10匹及10Nm，不過多得車身加磅110kg，加上6速MCRaceShift半自動波箱，令轉檔反應非常敏銳。在深赤石山路兜上一圈，先後以Auto模式及Sport、Race等行駛，雖負重1,900kg，但彎路表現依然靈活凌厲。