一條鎖匙你估值多少錢，幾十蚊？幾百蚊？呢個價錢一般嘅大門大閘就差唔多，但作為一部幾十萬甚至幾百萬嘅名車，顯示身份象徵嘅車匙身價一樣不菲。幾千蚊一條車匙已經係入場費，四萬五蚊嘅水晶車匙先至稱得上係真正的匙中貴族。
記者：趙慧敏
攝影：譚盈傑、陳陶鈞
Model：Betrys@GME
真水晶真優雅
夠膽索價$45,000一條嘅水晶車匙，當然唔係你同我都有機會揸嘅一般平價錢七，而係被譽為占士邦專用座駕的英國名驅AstonMartin。擁有呢條鎖匙固然係尊貴車主的象徵，不過最緊要並非AstonMartin旗下所有車系都配備呢款水晶車匙，只限於部份型號如DBS及Rapide。而車主買車時隨車配備兩套的車匙中，也只有一套是水晶車匙，其中一套只是一般膠料車匙。
矜貴之處除一車一匙外，當然是質料，車匙前端由貨真價實的水晶鑲嵌，水晶下透着AstonMartin徽號，握在手中很墜手，配上金屬味濃的飾邊，精緻優雅味道襯絕車形，在陽光下甚至晚上在車廂內昏黃暗燈下，水晶切割面散發着鑽石般閃爍光芒！車匙採直插式設計，方形車匙直插入方形直匙孔，露出AstonMartin徽號，實用與視覺效果兼備。
遺失另加防盜裝置費
一般車主買車絕不會問車匙價錢多少，不過貴為水晶車匙，似乎不是給車主粗用，根據經驗，車主並非因遺失鎖匙重配，而是將水晶車匙掉在地上令水晶損毀，咁唔小心當然要付出代價，要由英國重新訂製鎖匙，除$45,000外，還要付重新調校防盜裝置費，閒閒哋要五萬元至搞得掂。
SuperKeys
就算未真正擁有過一部靚車，喺街上、停車場總有唔少機會同佢哋近距離接觸；不過靚車見得多，車匙永遠握喺車主手上，想同佢親近一下，更何況係Supercar級嘅車匙，機會就更加唔多！既然係咁，就趁今日介紹車匙王之外，再Show吓現時各車款部份車匙嘅設計。
老細級車型
賓利$3,000-$4,000
屬摺合操控，設計偏圓渾，車匙前端可收起，開車時才㩒掣彈開，行內人一般會稱這類車匙為劍仔匙，望真啲又真係幾貼切，而匙面當然刻有賓利標誌。
勞斯萊斯約$10,000（資料由行內人提供）
坐在尊貴的勞斯萊斯上，揸住車匙啟動部車，似乎是司機主要工作，車主只是欣賞就足夠。
車匙採方形設計，與AstonMartin一樣以整條鎖匙插入匙孔啟動，設計較簡單，車匙配上金屬飾面，並刻有勞斯萊斯的R字樣。
房車型
平治$3,000-$4,000
以隋圓形設計為主，上窄下寬，頗似一個小型水桶；不過操控絕對齊料，除用來開關車門外，連尾箱都可搵車匙來開關。
寶馬$3,000-$4,200
採方形設計，中間配上寶馬徽號，四四正正，頗有房車Feel。
跑車型
法拉利約$10,000（資料由行內人提供）
跑車講究最原始的操控，插匙起跑動作能令駕駛者腎上腺素飆升，所以車匙亦以傳統設計為主，唔玩甚麼花臣，車匙以膠料為主，最特別之處是車匙均採用拉利紅，上面刻有法拉利徽號；不過亦有愛車之士怕刮花車匙上嘅膠料，唔用時就用皮套包起。
林寶堅尼$3,000-$4,500
車匙以上方下斜來設計，外形頗為獨特，車匙以摺合式處理，同樣要㩒掣彈出車匙才可以着車。
