上個禮拜車路士捧走隻巴克萊亞洲錦標賽獎盃，仲以為英超熱浪捲走後，本地球壇可以降一降溫，點知噚日公民喺跑馬地球場友賽大埔，3位性感火辣嘅足球寶貝Honey、Yuki、Fiona（QQ）突襲球場，即刻辣㷫跑馬地。就算球季未開始，班足球寶貝已經相當落力，送晒飛吻咁，呼籲球迷入場支持公民。新球季球迷記住入場睇班足球寶貝啦！
熱情阿馬利抱起Honey
噚日跑馬地區有成攝氏35度，公民友賽大埔就喺正中午一點左右開波，本身已經夠熱，仲加埋幾個足球寶貝，嗰場面令人唞不過氣。開波前公民球員先影大合照，班球員就好鬼識做，即時幫Honey擔遮，慌死呢位靚女曬親。本身係台灣人嘅Honey，喺阿根廷長大，美國讀大學，又做過兼職model，嚟咗香港兩年，家做緊空姐；佢啲廣東話唔鹹唔淡，更加得人鍾意。Honey正宗鬼妹仔性格，見到同樣來自南美洲嘅公民巴西外援阿馬利就特別熱情，阿馬利唔客氣仲一手抱起Honey。上兩個禮拜開操，阿馬利仲話掛住喺美國嘅老婆，噚日就真係好難講嘞！
Honey話，好細過就睇波，最鍾意阿根廷嘅奧迪加（Ortega），又話舊年巴拉圭來港友賽時，做過辛達告魯斯嘅繙譯。當然，佢都有入場睇公民比賽，而印象最深刻就係銀牌決賽，公民擊敗南華嗰場經典賽事，佢話今年都要撐公民撐到底，又話最鍾意「鹹蛋」馮啟匡同埋迪天奴，讚佢哋兩個好叻、好波喎！
3寶貝打氣仍不敵大埔
問Honey有乜噱頭幫球隊打氣，佢話想搵多啲朋友幫公民打氣，諗多啲slogan，又賣關子話：「仲有好多嘢，家唔可以講住！」咁有乜招數砌低其他球隊嘅足球寶貝？佢就好大方得體咁話：「唔使打低佢哋，大家一齊加油，最重要係香港多啲人睇足球！」Honey真係識人啫！
佢仲拉埋兩位好友Yuki同QQ組成公民啦啦隊，3個鬼死咁熱情，即場大送飛吻，叫啲球迷如果想睇佢哋，一定要入場支持公民踢波！講番噚日場友賽，公民最後輸2:3，最衰大埔嘅足球寶貝LuLu冇到場，如果唔係可以同場較量，熱爆跑馬地！
