電影《竊聽風雲2》主要班底雖然與上一集分別不大，依舊由麥兆輝、莊文強執導，三大型男劉青雲、古天樂及吳彥祖主演，但今次加入實力派老戲骨曾江、胡楓、駱應鈞及江毅等演出戲中「地主會」成員，難怪連影帝級的青雲亦表示在前輩面前，自己好像o靚仔。
新片《竊聽風雲2》月中上映，主角劉青雲、古天樂及吳彥祖日前為電影宣傳接受記者訪問，三人不約而同提到戲中一班老戲骨，青雲提到與一班前輩合作非常開心，令他覺得自己回到年輕時，他說：「同佢哋一齊拍好開心，我真係覺得自己終於可以做返o靚仔喇，同埋佢哋真係好專業、好有活力，可以一次過讀三頁幾對白！」
吳彥祖暴食增肥
吳彥祖笑言自己在片中要「恰」一班前輩，感覺奇怪：「我由細個開始已經睇佢哋啲戲，佢哋後生時咁型，但喺戲入面就要恰佢哋。」至於古仔就表示拍攝時會專登提早到拍攝現場聽前輩話當年。
《竊聽2》跟上集同以金融股票巿場為題材，但角色設定及造型有大變化，尤以吳彥祖為甚，戲中飾演一名退伍軍人的他在三個月期間增肥25磅，平均每日吃五餐：「我一日要食五、六餐同用兩至三個鐘做健身，老婆返到屋企見到我周圍都係零食，都問我係咪黐咗！」
古仔飾演為破案可以心狠手辣的警察，當中有不少動作場面，與Daniel的一場窄巷打鬥戲更打至見紅。
古仔預錯位爆缸
古仔說：「嗰場戲講我同Daniel喺窄巷度打嘅，佢有一場戲要撻我，點知預個位差咗少少，結果我成個拳頭擦咗落石屎牆度，即時流晒血。」
採訪：文國駿 攝影：陳慧安
化妝：JaneLeung、VicKwanofiihair&nail（吳彥祖）、CarmenMan（古天樂）