香港時間今日下晝6點，喺瑞士會進行歐聯抽籤，雖然係附加賽，但由於歐洲足協根據公平競技原則，按球隊用唔同方法踢到歐聯嚟分組，分別係歐洲次級聯賽冠軍嘅「冠軍組」，同埋按聯賽排名奪得歐聯資格嘅「聯賽組」，結果聯賽組入面嘅球隊實力勁強，阿仙奴、拜仁慕尼黑及里昂等5隊，雖然被列為聯賽組嘅種籽，但就要面對烏甸尼斯、魯賓卡山及川迪等其他5支非種籽隊，都咪話唔難踢。阿仙奴領隊雲格除咗愁歐聯附對手之外，中場法比加斯（左）扭計想離隊，亦令佢好頭痛，有小道消息話，雲格俾法比仔激到嬲嬲哋，打算喺歐聯附派佢落場，等法比仔成季唔可以幫其他球隊踢歐聯，一拍兩散！