知你懶，連十零分鐘都懶行去三聖，Fine！黃金海岸商場一樣有好嘢食，細細間日本餐廳真係行過咗都唔覺，即劏游水活石鯛，切片擺上碟仲係口擘擘，你話唔新鮮？我打死都唔信！
記者：徐務研
攝影：譚盈傑
Model：Ice
石鯛越驚越標油
我家住黃金海岸附近，久唔久都會蒲過呢頭食飯，但咁多年都唔知有呢間「熊屋刺身專壳店」存在，細細一間舖，眼力差啲都搵唔到門口。
望餐牌，嘩！唔係啩？連活做刺身都有提供，但見師傅手起刀落，生猛石鯛瞬間分屍，條魚係咁郁，師傅刀工好勁，切到整整齊齊上碟，Ice尖叫：「魚嘴仲識郁o架！」印尼石鯛油份高，點解要活做刺身？「新鮮啲吖嘛，同埋石鯛受驚嗰陣會分泌多啲油份，活做刺身味道特別好。」一片刺身放入口，Ice即時直豎拇指，食完魚身，以為要同魚頭講Bye，老闆娘話：「魚頭可以炸骨或者煲湯，條魚可以食到盡。」咁正嘅一條龍服務，好細心。
講刺身，我最愛活象拔蚌刺身，智利象拔蚌比較細隻，但更甜更爽，我同Ice食到渣都無得剩。食開有條癮，試埋洋風柚子汁油甘魚，日本長崎油甘魚魚油超豐富，勁滑好腍身，上撒鹹香三文魚子，配清淡魚肉，味道一絕。
陶燒靚牛無油煙
當真又愛又恨！愛鐵板燒即煎充滿油香，又恨鐵板燒搞到我一身油煙味，行出街俾人歧視，師傅幫我燒埋都算，要我落手落腳真係咪搞！所以一聽到陶燒，我即時耍手擰頭，老闆娘：「陶燒即係用陶板燒肉，陶板即係耐熱嘅陶瓷，佢有鐵板燒嘅效果，但係又無咁多油煙，唔會搞到你成身成陣味。」Ice即燒美國特選牛肩肉眼，呢個部位運動量多油脂少，肉味濃好結實，煎香好Juicy，自己郁手燒特別有成功感，玩完煮飯仔唔會油煙滿面，Ice激讚。鍾意食牛？仲有美國極級穀飼牛肉鍋，選用Prime最靚等級，油光均勻做火鍋最正，除牛肉外有勁多蔬菜，唔會太Heavy。
想食凍嘢，首選北海道毛蟹餐，蟹膏味道濃郁好香滑，凍食真係一流，跟餐有韓國馬糞海膽，甘甜唔腥，一啖就食得出係靚嘢，大大隻加拿大牡丹蝦清爽鮮甜，韓國活赤貝即叫即開，爽口至極，呢個套餐，肯定夠飽肚。
如果咁都滿足唔到你，要試特上刺身盛，有齊大吞拿魚腩、活赤貝、牡丹蝦、馬糞海膽、劍魚腩、三文魚腩同時令白身魚，大包圍總有一款啱你口味。各種生蠔即叫即開，新鮮到無可挑剔，澳洲塔斯曼尼亞有海水味、澳洲SmokyBay夠爽身、法國尊拉度海水味重、浪漫之蠔勝在Creamy兼蠔味重、法國諾曼第就最甜，最後嘆埋智利水晶蜆，Ice同我食到嗦嗦聲，呢一餐，飽咯！
熊屋刺身專壳店（26130399）
地址：屯門黃金海岸商場地下S1C號舖