為咗培養金融衍生工具交易員，中大商學院得到國際金融界支持，成立咗一個模擬實驗室，學生可以在內使用實時資訊做紙上/虛擬交易，累積經驗。做交易員最緊要反應敏捷，腦筋轉數快，能在電光石火之間，下重大決定，基本技術要求就係數學好、掌握宏觀大事嘅趨勢（例如歐美債務危機）。入得中大讀計量財務嘅學生，相信都係理科尖子，考試成績好好之人，但如果先在實驗室交易「慘敗」，從錯誤中學習，累積經驗，畢業後加入金融界，競爭力當然大大增強，股票L對佢地寄予厚望。
做尖子，是否可以由金錢堆砌出嚟？唔一定。睇蘋果日報七月二十三日整版報導「準媽媽朱凱婷一千萬養大一個BB」，未免誇大得緊要，嚇怕啲年青已婚未生育女士。朱凱婷一九九九年畢業於中大市場學系，佢有冇計過，自己真係用咗父母一千萬？中文大學啲學生是否個個係千萬BB出身？答案當然是否定的。傳統上，中大學生絕大部份來自公屋，好少富家子弟，亦少國際學校學生，並不是金錢堆砌出來的。
朱凱婷之「千萬BB論」主要根據係哈囉學校發債券（debenture），每張面額三百萬，每家長買一張，先至可以為一位兒女申請入校。既然如此，養大BB就要一千萬喎。咁講法，即係當香港九年免費教育冇到。其實在三三四學制下攻讀十二年本地學校，學費好少，買齊十二年課本，亦不過四萬元左右，再加埋零用錢，到入大學為止，五十萬元夠喇啩？當然，如果計埋補習費、學習樂器費、芭蕾舞費諸如此類，個個家庭不同，好難一概而論。
不少家長盲目崇拜國際學校、直資名校，已達走火入魔階段，冇錯，呢類學校係做得好好，學生成績甚佳，但帶有階級性，中產家庭強求未必幸福，總要腳踏實地，諗清楚至好。左丁山曾有大把機會送子女入國際學校，最後決定放棄，讓佢地接受街坊學校免費教育，至今未曾後悔過，子女現在好有社會競爭力啫。新結婚家庭，唔好俾朱凱婷唱高調嚇到唔敢生育呀！