金銀業貿易場開檔101年，係地球上少數保留公開喊價制度嘅交易所。成個世紀咁長，點點滴滴多到數唔晒!
貿易場理事長張德熙噚日喺國際認證財務顧問師協會（IARFC）演講，佢話香港金市喺80年代嘅成交額，每分鐘原來係數以十萬両計，仲有成100至200幾個交易員堆埋喺貿易場裏面嘅交易大堂一齊叫價，熱鬧之餘，插眼、叉頸兼踩腳嘅情況不絕!
人多易踩親 轉着白飯魚
Heywood話，由於插眼嘅情況嚴重，所以好多行員落場都戴番副眼鏡買個保險，於是搞到貿易場成場四眼仔，另外，踩腳情況亦好嚴峻，咁皮鞋踩皮鞋係非常之痛嘅，於是貿易場索性叫行員換番對「白飯魚」先落場，唔使收市嗰陣眼盲兼腳跛!
咁家陣電子化就無咁多插眼踩腳，但係想當年，Heywood話上任理事長李德麟因為大膽力推電子平台，搞到黑髮變白人人都知，佢自己當時係副理事長，頭髮只係白咗少少，家陣到自己坐正，就算無一夜白髮，稍後都走唔甩一頭白髮咁話!
講開又講，每年金市農曆年開市，都要搵「官」主持開市儀式原來係有原因嘅，Heywood話咁隆重其事，原因係全亞洲第一口價，係由金銀業貿易場開出，所以一定要嗌得好好睇睇……真係唔講唔知呢！
李華華
mailto:[email protected]