【鋒芝變之互出高招】
鋒芝婚變局面仍未明朗，不過因為栢芝仍心存希望，所以遲遲唔肯落實簽字辦離婚手續，加上今日又係大仔謝振軒（Lucas）4歲嘅生日，雖然栢芝就放風話會邀請霆鋒、老爺謝賢同奶奶拉姑一齊參加Lucas今日喺陽明山莊私人會所嘅生日派對，不過栢芝有見霆鋒噚日上咗去，佢索性call齊外家嘅親人，包括同母異父嘅姐姐戴碧芝母女等，提早幫Lucas開P，仲會一連玩兩日，為壽星仔迎接4歲生日。
霆鋒呢排雖然留喺香港，但就唔見佢去探囝囝，馮仁昭聽聞因為佢打敗仗，唔想將感冒傳畀對寶貝仔。霆鋒噚日精神好啲，朝早11點幾就撲去陽明山莊，之後一班栢芝嘅親友又去埋，提早幫Lucas開生日P。噚晚近8點，栢芝嘅化妝師RickChin同栢芝經理人Emily相繼離開，張豪龍亦接葉佩雯離開。栢芝媽離開時接載兩名女友人同一個細路女，佢架車嘅倒後鏡掛咗一個舉中指嘅牌，有教壞細路之嫌。對於鋒芝係唔係一齊陪Lucas過生日時，栢芝媽就冇回應。
據知其實霆鋒噚日帶埋律師去陽明山莊，爭取機會同栢芝搞離婚手續，不過栢芝就遲遲唔肯動筆，佢諗住Lucas過埋生日或者有轉機。不過霆鋒都睇穿栢芝想搞大龍鳳，所以佢打算再搵日同乖仔，仲有嫲嫲、爺爺同姑姐慶祝生日。
王晶讚栢芝演技好
另外，栢芝同Lucas母子檔演出嘅《無價之寶》將會喺下月上映，由於栢芝忙拍《河東獅吼2》，又要湊仔，所以導演王晶自然瞓身宣傳，大讚栢芝演技比以前成熟，又將佢同霆鋒都冠以天才演員嘅稱號，王晶話：「Lucas還小，我只能找一幫小孩和大人跟他玩，之後捕捉他的神態和反應，剪起來就天衣無縫。」
