亨利喺阿聯酋球場捧盃喇！換轉以前，佢捧盃係阿仙奴嘅幸福，家陣蟬過別枝捧盃，就係阿仙奴嘅不幸。紐約紅牛周日喺酋長盃逼和阿仙奴1:1，令兵工廠唔能夠喺呢個賽事3連霸，本報阿仙奴死硬派粉絲守丹慨嘆隊波衰到連呢個盃都捧唔到，直頭係凶兆，唔通今季又……
酋長盃改制冇乜人知
呢場波，阿仙奴有個好開始，由尹佩斯完半場前先開紀錄，形勢大好，據講，喺半場休息嘅時候，領隊雲格忽發奇想，同球證商量可唔可以喺下半場最後幾分鐘畀亨利可以換件阿仙奴波衫入場，等佢代表阿仙奴出賽，贏吓掌聲。雲格一番心意，結果被球證否決，話比賽唔可以咁冇規矩，相信佢已經唔好老脾。
眼見下半場大部份時間搓嚟搓去，以為阿仙奴可以將優勢帶到尾，好衰唔衰年輕球員巴特利唔爭氣喺84分鐘擺老烏。呢個時候莫講話掌聲，球迷甚至開始柴台，雲格肯定更加㷫過辣雞。
「要買人先爭到標」
今屆賽事無聲無息改咗制，先計分數，最後同分至計入波，呃晒全世界，講波佬全場都仲講緊鬥入波。紅牛以1勝1和嘅成績捧盃，由於巴黎聖日耳門同日早場大炒小保加3:0，令兩場都和波嘅阿仙奴得兩分衰到跌落第3。守丹眼見愛隊失利，自己失金：「等我仲買『大』，害人不『錢』！」呢句唔知係咪兵工廠擁躉嘅心聲？
回想當年亨利為阿仙奴屢立戰功，今次喺舊東家主場再捧盃，百般滋味在心頭。同樣感慨嘅係韋舒亞，佢因為足踝受傷，雖然傷勢唔重，但為免加劇傷勢，保險啲踢咗7分鐘就退下火線。佢賽後直言隊波唔夠強：「如果我哋有多啲新面孔，加添幾個援兵，就可以爭奪聯賽錦標。」連球員都講到咁白要擴軍，高層收到冇？
