從前，白雪公主得到王子一吻後便蘇醒，愛的力量真的那麼強嗎？於是公主回皇宮時，親吻了其黑色的林寶堅尼，座駕頓時由黑變白，變成白牛王子。雖然呢個故事好明顯係純屬虛構，但有車主專登花幾十萬打造全港唯一的啞白細牛，花上的還有萬千心思。
記者：蕭漢祥
攝影：林栢鈞
Model：Leslie@Chinadolls
黑牛變白牛
曾經聽位男性朋友講，一生人擁有一架林寶堅尼就夠，其背後原因除了滿足於這架超級跑車的性能外，更是林寶堅尼的外形始終如一，無論它推出任何款式，好多時都係外表上只作小改動，最近推出的意國國慶版本就係最好例子。有車主為了讓自己的細牛更與眾不同，決定花數個月時間將原來的「可樂雪糕」變「鮮奶雪糕」，仲要係非一般的白色。
啞白好罕有
在香港，噴到全車都係啞黑色越趨常見，反而啞白色，恕我孤陋寡聞真係未見過。今次的細牛重新噴上啞白色，而部份配件如側鏡、尾燈、尾章等則噴上啞黑色，令視覺上造成強烈對比。
車主先從意大利車廠訂購與LP560-4型號一樣的啞白油來港，至於ColourCode係乜？車主話係秘密。與此同時，車身亦重新設計，車頭泵把、裙腳、車底擾流及尾翼統統在日本搜羅，經過裝嵌之後才噴油。其間最困難地方是每一幅噴油都需要一氣呵成，只要有一粒塵都需要完全起油，重新全幅再上色，非常嚴謹，難怪齋係全車噴油都花近兩個月時間。
瘦身為狂奔
話說拍攝當天，在獅子亭等待車主來臨時，突然聽到從遠處傳來雄渾沉實的引擎咆哮聲，就知道有勁車上緊山。而且齋聽聲，唔使問都知道這細牛不單止有外在美，連內在亦變得更美。
車主將細牛換上鈦金屬尾鼓，除進一步輕量化外，引擎的呼吸聲更加低沉而響亮；為了令細牛跑得更暢順，亦換上了跟Superleggera相同的離合器，使轉檔時離合器的敏感度更高、反應更快。輪胎方面，車主改用HREP40系列的胎軨，其航空級鋁鋼、單幅的製作，提供更高強度及更好的重量比。而前後軸分別使用19及20吋胎軨，配合小量調低車身，微微向前傾斜，使到起步及攻彎時均有更好表現。
改裝清單
‧全車啞白、啞黑噴油$88,000
‧全車包圍$260,000
‧鈦金屬尾鼓$60,000
‧原廠倒車鏡頭$20,000
‧HREP40胎軨及Pirelli輪胎$90,000
‧原廠Superleggera極力子$50,000
總費用：約$600,000（連工包料）
LamborghiniGallardoSpyder
引擎：5,204ccV10
馬力：560hp/8,000rpm
扭力：55kgm/6,500rpm
傳動：E-gear六前速半自動波箱
售價：$3,988,000
