巴克萊亞洲錦標賽曲終人散，得亞軍嘅阿士東維拉噚晚亦已坐夜機返英，臨走前全隊到尖沙嘴，大嘆北京填鴨，話別香江前都要擦餐勁！
維拉應贊助商雲頂集團邀請，傍晚先到海運大廈碼頭，喺集團旗下嘅郵輪前影大合照留念；不過佢哋未有上船參觀就急急腳走人，原來佢哋去咗附近嘅星光行北京樓酒家開餐，全隊職球員加埋贊助商，一共開咗5席，每圍都order咗「京城紫荊春夢」套餐；未計加一，每枱盛惠4,180元。
10道菜之中，最大賣點梗係北京填鴨，皆因唔少人都知呢道係酒家招牌菜；卜卜脆、香噴噴嘅鴨皮，聽到都流晒口水，不過脂肪油份都有番咁上下，難怪球隊等到踢晒兩場比賽先至敢食。套餐其他菜式仲有炸蝦球、雞燉翅同松子鮮魚等等，聽落都好豐富喎；返到英國，維拉有冇咁好餸呀？