大阪櫻花中場乾貴士(圖),周日主場對鹿島鹿角後就轉投德乙嘅波琴,呢場告別戰原本都有好開始,22分鐘佢幫櫻花先開紀錄,但佢個告別派對就俾一對南韓仔搞寸;櫻花先有門將金鎮鉉,上半場尾段連番失誤,先喺38分鐘「生波」時放低個波,俾鹿角前鋒田代有三偷到,轉身射入空門。7分鐘後,金鎮鉉又出迎失誤,俾田代有三頂入空門。下半場櫻花原本有追平好機會,78分鐘博到12碼,乾貴士爭住射,但南韓中場金甫炅唔讓路兼射失,嬲到乾貴士生蝦咁跳。完場前金鎮鉉俾小笠原滿男半場笠死,櫻花反輸1:3,乾貴士呢場告別戰認真難忘喇!