歌仔都有得唱：「保齡，保齡，男女喜愛玩球」，好明顯，講出打保齡球時個波嘅重要性，所以一定要認清唔同球嘅特性，揀一個啱自己嘅波；原來呢個波，亦有分敏唔敏感，唔識分？摸一摸，即知！
記者：王震遠
攝影：伍慶泉
Model：Catherine@InterplayWorkshop
10分1體重？
阿媽教落「工欲善其事，必先利其器」！要打好保齡，當然首先要揀一個適合自己嘅波：「保齡球尺寸有一標準！重量通常是6-16磅，但很多時在球上沒有標明，買球時要問清楚！」保齡球教練黎家朗說。
「初學者揀波，一般都會打HouseBall（公用球），選擇波的重量，理論上是體重的10分1；例如你是140磅，就可以選擇14磅波。」
理論還理論，實際未必咁理想：「不過保齡場上的公用球，手指位都唔太啱初學者，14磅嘅球窿永遠都係好大唔啱手形，或者你未必有咁好力；所以女性大概會揀6至10磅的保齡球，男性選擇9磅以上都OK，不過理論上當然揀10分之1係最好！」
數波波
Spare波 玩膠感
保齡球內藏波膽，可直接影響波嘅走勢！除此之外，表面嘅質料一樣會有唔同功效：「打保齡好少只打直波，因為曲球嘅全中率會高好多！球道上是有油的，但亦有分多與少、長與短，所以為咗配合唔同球道，就須要用唔同嘅波嚟配合！」
保齡球上嘅球感同手感，一般用敏唔敏感嚟形容：「有啲波比較無咁敏感，兼滑身少少，所以同球道嘅磨擦力就會小啲，如果去到乾身球道，效果就會發揮得好啲；如果條Lane比較多油、好Wet，我哋就會選擇敏感少少，啞面少少嘅球，呢啲波磨擦力大啲，會適合用於比較油嘅球道上面使用。」一摸上手，自然一清二楚。
「另外還有一種Spare波，表面係用咗俗稱膠嘅物質，而呢種Plastic同Lane嘅磨擦力係相當之小。當須要打補中嘅時候，如果用一個轉彎度強嘅球去打，例如要打最邊的10號樽，係會好困難的，所以就要靠呢種波，因為磨擦力細，打出直球會比較容易，就算旋轉幾多都只係彎好小！」
跣腳鴛鴦鞋
「推球的最尾動作，借力的時候須要將腳撐出去！如果兩隻腳都一樣跣，就撐不出去，所以買球鞋時須要跟店員溝通，告知自己右撇還是左撇，佢就會給你一對鴛鴦底配合。」雖然懂得分自己左右手，但到底左右鞋底會係咩質料，就要細心記住：「用慣右手的人，都會用左腳跣出去，所以左腳須要用皮做才會跣得動，而右腳因為要借力，所以都是用生膠底的。」
IronMan上手
保齡場內，唔少貌似專業球手嘅玩家都會IronMan上身：「在場內常常會見到人戴機械手或手套；特別是女性，手腕未必夠力、會向後跌，所以就有須要戴上手套，去幫助頂住手腕，咁做更容易做到轉彎效果。」
手套亦有兩款之分，有的有金屬配件，有的就似護腕多啲：「機械手有金屬配件，所以能夠調校，可以作出不同程度的後移幅度；手套雖不能調校，但一樣可以頂住手腕，起到保護作用。」衣着方面，保齡球就不算嚴格：「打比賽的話，男性須要穿長身西褲或運動褲，上身衣着規例，是要穿有衣領的衣服，例如Polo衣，而女性就可以穿短褲！」
