喺香港舉行嘅巴克萊亞洲錦標賽落幕，我求大俠同香港唔少球迷一樣，唔喺球場就喺電視機前，欣賞3隊英超球隊同港甲冠軍傑志，打咗4場好波；難得英超開季在即，3支英超隊都冇錫身，絕對值得球迷稱讚。不過，唔識避重就輕，就可能付出沉重代價；好似保頓嘅南韓翼鋒李青龍咁，上周六對非聯賽球隊紐樸特時斷腳受傷，養傷期可能長達9個月。
右腳兩處骨折唞9個月
保頓友賽紐樸特輕鬆贏3:1，不過領隊哥尼就肯定笑唔出；上半場31分鐘，李青龍同對手中場湯米拿硬接一招就應聲倒地，結果軍醫事後證實青龍傷勢唔輕，立即送到醫院做手術。之後，哥尼透過官網好傷咁公佈：「手術很成功，也很多謝所有醫療人員的協助；會方將給予青龍一切可能的協助，幫佢復康同重返球場。」
原來青龍右腳脛有兩處骨折，養傷期估計長達9個月，新一季大部份時間唔使預佢。哥尼就真係煩爆，事關季前已經有艾文達、史杜列治離隊，諗住從般尼簽入前曼聯翼鋒伊高斯，同李青龍嚟一招雙翼齊全；但未開「咧」就折一翼，或者都要靠番32歲老人家馬田柏杜夫。
其實係唔係亞洲球員一落場就唔識錫身呢？國際米蘭去咗愛爾蘭都柏林，踢咗兩場友賽，備戰8月6日對AC米蘭喺北京鳥巢舉行嘅意超盃；上周六先鬥些路迪，日本左閘長友佑都踢咗9分鐘，就同對手喺爭頂下撞傷肩膀。
長友佑都避戰意超盃
軍醫事後證實，長友佑都右肩脫臼，不單肯定缺陣嚟緊嘅意超盃，連4日後對南韓嘅國際友賽都無緣上陣。長友佑都受傷，間接搞到辛尼迪要縮短假期；事關國米閘位兵源短缺，教練加斯柏連尼只好要求參加完美洲國家盃嘅辛尼迪即刻歸隊。