「維園阿哥」任亮憲早前因涉嫌強姦A小姐而沉寂咗一段時間，不過隨住警方決定唔起訴，佢又慢慢活躍政壇，仲考慮出戰11月嘅區議會選舉。另一邊廂，A小姐亦重新上路，積極參與社運。呢對風波中的男女，男嘅就脫離咗社記，女嘅就投身白鴿黨，可謂各自各精采。
贊助會員冇投票權
八方近排去遊行都不時見到A小姐，就連噚日白鴿黨開特別黨大會都有佢嘅身影。原來佢已經入黨個多月，但目前只係贊助會員，喺黨內冇投票權，亦唔會代表民主黨參選嚟緊嘅區議會選舉。聽聞A小姐一直都想加入政黨，過去試過揸公民黨支旗遊行，到一、兩個月前白鴿黨中委正式批准佢加入。A小姐噚日喺特別黨大會坐足全程之餘，就連之後嘅記者會都留低旁聽，熱心過唔少資深黨員。
不過有「白鴿」私下同八方講，其實A小姐成功入黨係中委一時大意，因為過往傳媒報道有關A小姐嘅新聞，都冇登佢張相嚟保障佢私隱，結果當佢申請入黨時，大家根本唔認得佢。但白鴿黨副主席單仲偕話，只要同個黨理念相同嘅人，都歡迎加入喎。