林峯第三個紅館個唱，前晚正式開鑼，在沒有潘霜霜在場，只得道具貨櫃箱、十多位舞蹈員、緋聞女友陳嘉桓和愛錫他的經理人樂易玲陪同下，chok爆紅館三小時。嘉賓草蜢和許志安亦以「chok」字來取笑他。他更不忘情深剖白近日被戴思聰指他追女同學的傳聞，又指曾對潘霜霜踩場有過疑惑，隨即又說「入得場都係我care嘅人」。
換上六套衫的林峯，雖然常被取笑做chok峯，但他對chok字十分受落。他在台上亦說：「我冇chok幾個月，其實chok唔只表面同個樣，要靠自信心。」當晚跟表演嘉賓草蜢合唱《永遠愛著你》後，蔡一智說：「後台我聽到有人話佢跳舞跳到個台搖晒，我話唔係，係林峯跳到個台chok晒。」安仔就同林峯合唱《男人最痛》，安仔搞笑改歌詞「男人最chok，林峯最chok是這種」、「林峯是仍捨不得你，林峯讓情無疾而終」，林峯忍笑繼續唱歌。
眼濕濕剖白心聲
林峯更回應近日被戴思聰在回憶錄寫及他學唱歌時已想追女仔一事，他唱畢《我很痛》後，以6分鐘眼濕濕剖白心聲說：「呢三個字概括咗我嘅心情，最近有好多唔開心事發生，有時我唔知應該點回應。幾日前我喺呢個台，搵唔到第一、二次嘅感覺，欠缺咗一樣嘢。」此時歌迷大叫他欠缺女友，他則說：「我終於知係欠缺你哋嘅掌聲，你哋令我企番起身。」歌迷睇得癡醉，瘋狂到扯他的褲，更差點用手拍到「小峯」。
事後他在後台接受訪問，問到會否擔心潘霜霜來現場，他說：「老實講冇話驚，但都有疑惑過。一開場我都講過，入得場都係我care嘅人，希望佢哋帶住開心心情嚟睇。」而緋聞女友陳嘉桓坐在第一行欣賞林峯全晚演出，可惜他稱並未看到。
否認戴思聰所指
另外，被問到戴思聰指他10幾歲已想追同學，林峯稱對該女學生沒印象，還說：「佢係我啟蒙老師，人已過身，我唔想講呢個做話題。冇可能，冇發生過。我18歲先拍拖。」至於對方稱林峯曾承諾將來踏足紅館定請老師到場欣賞，但只得空講，林峯稱：「點會冇呀？但嗰陣我唔係話喺紅館開演唱會，類似係講如果做歌手搵到錢，會請老師食飯，唔係講到咁大嘅，就算第一年做騷，都唔敢講我有機會踏足呢個舞台，咁細個時點會咁講呢！」
採訪：王連連 攝影：陳俊強
