睇到體育版的招聘廣告，誠徵編輯，看一看要求條件，雖然只有5項，可看一眼就知道自已並不符合資格，有點失望。常以為當初若不是做了娛樂記者，便應該跑體育新聞，因為我不只是愛睇電視，愛看電影，愛聽歌而已，其實我更熱愛體育運動，起碼我有參與，有游水打波，幻想過自己係日劇排球女將的小鹿淳子！
單單一項精通英、意、西、德及其他聯賽足球形勢，就足夠打沉我了。雖然自稱是足球迷，但太過揀擇，睇來睇去不過是英超，極其量睇少少西甲，莫說意大利及德國聯賽，有些時候，見體育版相關法甲、澳職聯及日職聯都有重點介紹，你問我佢哋係乜？除隊名和一、兩個球星名字以外，其他都係佢識我，我唔識佢。
一個人若果精通一個聯賽其實已經很厲害，舉個例子，像英超好了，要熟讀聯賽歷史，20支球隊的風格，要知不同的領隊就有不同的風格，像我最熟悉的阿仙奴，格拉咸與雲格帶領下，根本就是兩隊波。少不了的當然是各球隊的22個正、副選陣容，球會財政狀況，球星八卦新聞，還要旁及升降班的幾隊波，天啊，真不容易。
何謂精通，在我心目中，當然不光是背得出「出師表」，而是明白出師表的中心思想，缺乏閱讀能力往往流於空泛，能做到像張丕德於NBA，那就真是精通了，是不是很難呢！
難上加難的一點是這個編輯要是波經高手，即係要加埋賠率去分析拆局，預測賽果，我總是想若我有那樣的能力，就一定以賭為職業，還上班？你看看貌若雲格號稱蘋果波神的那位仁兄，不是每天都勤奮地工作嗎？連他都潛龍勿用，我還是死心好了！
文：盧覓雪