去海南島打高球就試得多，但特地飛去做Spa真是未試過，既然公關開宗明義叫我們體驗「觀瀾湖．海口」新開的火山岩礦物溫泉及水療中心，仲請埋識玩識嘆的廖碧兒Bernice，當然要去看其廬山真面目。
撰文、攝影：利思芸
鳴謝：觀瀾湖．海口國際高爾夫度假區
7大洲溫泉任浸
點解海南島有溫泉？話說幾十萬年前火山爆發，地下水從罅隙中滲出形成溫泉，所以眼前溫泉是貨真價實。其實整個火山岩礦物溫泉區有逾220個大大細細溫泉，觀瀾湖以世界7大洲劃分，率先開放的亞洲及澳洲就已經有62個，每個有特定主題，如「東瀛溫泉」的日本溫泉區就設大型日式庭園，有清酒池和櫻花、綠茶泉等。參照柬埔寨吳哥窟而建的「吳哥古蹟」主攻印度常用香料，設可舒緩頭痛及風濕症狀的丁香泉及去濕瘦身的蓮花泉。亦可選擇七色彩虹泉，在部屋環境中，試浸7種不同色的東方熱帶花朵及草本植物如天竺葵、菊花等炮製的溫泉。你亦可留在房內嘆私人jacuzzi，望住無邊綠茵園景，再叫早餐上門，真是c'estlavie！公關話其他洲分的主題區今年有機會落成，屆時選擇更多。
土樓內嘆Spa
為甚麼這裏會有福建土樓？原來這幢以竹建成的水療中心，每層分別以氣、土及水做主題，其中最特別是由人手建造的竹製圓頂，樓底甚高加強空間感。甫進大堂，服務員奉上甘香的海南苦丁茶，具備清熱、解毒及降血壓等療效，然後便可入房做Spa。先以「能量石沐足禮」作序幕，按摩師利用雞蛋般的能量石左按右按，連Bernice按後都話感覺好特別。做完足浴，Bernice試埋海貝熱能按摩，按摩師用溫熱的貝殼和香薰油，配合人手按摩，減輕肌膚繃緊、頭痛等。重口味的有翠竹和諧按摩，鐵通般粗的竹筒放在背上碌來碌去，有通淋巴之效。
細路哥玩冰火
酒店泳池間間有，但以火山岩做主題卻唔多。溫泉區隔籬的水上樂園區，遠遠就見到兩個火山造型滑梯，最啱精力旺盛的小朋友；且人造沙灘上更有沙灘排球場，打到身水身汗就可跳落水降溫，又或在橡皮艇上曬日光浴。度假村內還有KidsClub，下午有音樂教室、烹飪班等，仲提供Wii、Playstation，咁父母就可自由自在嘆spa啦！
世界級高球場打波
來到觀瀾湖，沒理由不打高球。原來Bernice打golf技術不差，她說度假村內有10個18洞高球場，因建於火山岩上，少點技術都很難打到。而曾舉辦《世界職業明星邀請賽》的BLACKSTONE壹號場，面積超過140萬平方呎，場內亦設有由活士前教練HankHaney創立的高爾夫球學院，還有型仔鬼佬或華人教練任擇。
食盡海南名菜
度假村內有幾十間中西餐廳任你試，當中我最推介中菜廳邀月庭，必食海南四大名菜包括文昌雞、嘉積鴨、和樂蟹及東山羊。曾任職北京希爾頓酒店的行政副總廚翟少元師傅指，因海南傳統菜式味道偏淡，因此他改良煮法，令味道更濃更惹味。以東山羊為例，一般餐廳只用次一級黑山羊，但邀月庭堅持用生長於海拔184米以上的東山羊，牠肉質緊實，味道香濃，加入大樹菠蘿一同烹調，入口全不覺羶味。和樂蟹則以膏滿油肥見稱，極啱嗜蟹膏的朋友。
觀瀾湖．海口國際高爾夫度假區
地址：海南島海口市觀瀾湖大道1號
前往方法：海口美蘭機場乘穿梭巴士
電話：28679132
建國初期，人民幣面額多達12種，於1953年推出面值最高的50,000元紙幣，分前新華門、後拖拉機及前收割機、後生產圖兩款，兩年後第二套人民幣推出，最高面額僅為10元，萬元鈔票漸成收藏家對象。
TravelMemo
持有效回鄉卡均可。
中國旅行社：28533533
康泰旅行社海口3日自遊行套票，乘香港航空或香港快運航機直航海口，入住觀瀾湖度假區，海口豪華客房，體驗火山岩主題水上樂園，連早餐套票價$1,889起。查詢：21088888
220V，兩扁腳插座
1元人民幣約兌1.21港元（文中價錢已折算港元）
下周24-31℃有雷雨
