機師上身　iPad平價起機

用iPad、iPhone做遙控，控制直升機其實並唔係新鮮事，早年推出嘅AR.Drone又型又好玩，只係價位去到二千幾，唔係個個捨得！呢部新出嘅i-helicopter雖然外表較平實，但勝在玩法簡單，用埋MotionControl真係有多少機師feel！最吸引係開價$499，抵！快啲攞起iPad、iPhone，齊齊「起機」！

記者：韓繼聰
攝影：伍慶泉
Model：Ruby

下載App即起機

i-helicopter外表其實同前排鴨寮街熱賣嘅遙控直升機無乜分別，只係個遙控唔同咗。只要用i系機喺AppsStore下載「i-helicopter」，再插上小型訊號發射器，你部i系機就即時變身遙控器！遙控操作介面簡單，基本上所有功能均由圖像表達，容易上手，咩人都識玩！用左手控制升降，右手控制前後左右，起初玩都有啲難度，需要少少時間摸索力度，但幾分鐘後就控制自如，連ModelRuby都大叫好玩！

■到AppsStore下載「i-helicopter」App就玩得。

■裝上小型訊號發射器，iPad即時變身遙控器！

體感操控似機師

i系機支援體感操控，唔少遊戲都係根據呢個功能開發。i-helicopter用得i系機做遙控，當然唔會錯過呢個功能喇。只要按一按畫面右上方嘅陀螺儀按掣，即時開啟體感操控！成部iPad變咗個軚盤咁，前後左右郁一郁就得，即刻機師上身！而郁嘅同時，右邊方向掣亦會自動移動，顯示方位，加埋機頭着燈功能，有型度即時又加幾分！佢支援三條頻度設定，方便你同friends一齊「起機」。不過由於機身太輕，室外玩超難控制，如果你自問係高手不妨一試，記住後果自負！其實隨機嘅叉電線用上USB取電，明顯就係方便各「機師」隨時用電腦叉電，喺室內安全飛行穩陣啲！