高登仔成日笑毒男冇錢買衫，出親街都係一個孤look，鬼咁寒酸。估唔到靠外表搵食嘅藝人，原來都可以一件飲衫走天涯。
柯打20件
講緊咪係謝安琪個潮老公張繼聰囉，佢由今年4月開始，無論行街、出席宣傳、抑或做電台訪問，都係笠住件藍色、唔長唔短嘅道士袍上身，着到成個濟公咁款，使唔使咁重口味先？
不過向來以潮人自居嘅聰兄，一啲都唔怕俾高登仔話毒，佢解釋呢件唔係乜嘢道士袍，而係2013年嘅超新裝，仲特登搵時裝設計師文念中設計，仲一次柯打咗20件㖭，唔怪得日日都係呢件啦！
呢套「異靈一衫」原來仲可以拉長縮短搓圓㩒扁，一衫在手，四季通行，聰兄直頭當正係寶，最正係慳番唔少買衫錢嘛。聰兄咁環保，睇嚟只有大劉先可以同佢鬥，佢嗰件圓領藍色上衣都係日日見o架！
撰文：辰秀
惡搞度+3 爆笑度+4 給力度+4
劉家昌達賴孖寶兄弟
劉子千今日紅到發紫，全賴老竇劉家昌逆向操作。佢幫囝囝炮製嘅娘爆三部曲——《唸你》、《冬港》、《粘你》MV排住隊上場，提供唔少茶餘飯後嘅話題。
估唔到劉家昌連自己都hit埋，有人發現佢同西藏流亡領袖達賴喇嘛好鬼似樣，簡直係孖生兄弟。
惡搞度+4 爆笑度+2 給力度+3
《真相》屙緊屎闊太
無綫劇集《真相》有收視有口碑，除咗捧紅新一代男神陳展鵬外，連扮演瘋癲闊太Emily嘅林淑敏都多咗人留意。事緣其中一集講Emily上律師樓發爛渣，擘大口叉晒手想食人咁款，結果林淑敏七情上面嘅演繹成為潛力圖，有人將佢變成喪屍同屙緊屎女孩，最癲係連特首都玩埋一份。
惡搞度+4 爆笑度+5 給力度+3
廁哥女僕ChokChokChok
大廚黃永幟因為主持無綫飲食節目《為食總司令》人氣爆燈，最近仲孖住高登女神高海寧同豬扒港姐陳庭欣飲飲食食，搞到勁多人封佢做「廁哥」，又笑佢虛耗過度甩晒頭髮，認真冇品。班手痕友仲玩無可玩，無啦啦幫佢設計女僕髮型，好似《變身男女ChokChokChok》咁，幟哥睇到唔知好嬲定好笑嘞！
惡搞度+5 爆笑度+4 給力度+3
