女孩子總是對甜品有一種情意結，近年由模特兒轉型開餅店的中、法混血名模AmandaS.就把興趣當成事業，為了追尋夢想，Amanda早前去了法國藍帶廚藝學院學成歸來，投資超過300萬於中環心臟地帶開設「PetiteAmanda」餅店，已悄悄開舖，將於9月在意大利結婚、首次做老闆娘的她，想把最傳統的法國味道帶到香港。 撰文：顏英儀
今年是混血名模AmandaS.人生重要的一年，籌備超過一年多的餅店終於正式開幕，今年9月11日是她的另一bigday，Amanda將於意大利羅馬披上MiucciaPrada為她打造的嫁衣，與拍拖7年的意大利籍男友ChristianCapelli結婚，展開人生另一個新階段。Amanda為婚事和開餅店忙到不可開交，約訪問也約了個多月才騰出時間做，地點是位於香港仔黃竹坑的廚房進行，可想而知她有幾忙。
圓創業夢考EQ
Amanda說：「我有成個月冇修過指甲，日日都喺廚房做training、不斷試食，但反而瘦咗，又要去中環跟進舖頭裝修，做生意事無大小都要親力親為，雖然一日只瞓3、4個鐘，之前到餅舖睇住裝修一日一日成形，都感動到流淚，好似初初同Christian拍拖嘅感覺，又開心又害怕嘅mixfeeling，家開業，心情又好興奮。」
行走天橋10年的Amanda，決定退出模界做老闆，她說：「我唔會再接騷，最多出吓event，不過創業後先知道做model工作原來簡單得多，做模特兒只要準時，keep住靚樣同身材就得，做老闆事無大小都要理，IQ同EQ都要高，不過開餅店一直係我嘅dream，今次真係dreamcomestrue。」
法式麪包重口感
香港租金高昂，初次踏足商界的Amanda說：「搵咗舖大半年，租金一路升，最初只係想喺跑馬地開一間細cakeshop，冇諗最後會喺中環ifc開舖，亦冇諗過個廚房會咁大，好開心搵到ifc個舖，大商場要求好嚴格，我當時乜嘢都冇，自己走去同地產商做presentation，之後收到電話話租個舖畀我，個舖得400呎，但已經好開心，Ifeelsolucky。」
首次創業，Amanda將做模特兒儲的老本投資在餅舖，她說：「由原本計劃嘅預算已超支4倍，有啲器材特別由法國運嚟，做餅嘅材料全部係最好，牛油、麪粉等都係法國入口貨，做牛角包嘅麪粉都係特別訂嘅，因為焗出嚟會更輕身，價錢當然貴好多，我唔想用平價嘅材料呃錢，因為我真心想畀大家食到真正嘅傳統法國麪包，而呢類型嘅傳統麪包喺法國十分流行，而且口感更有層次，價錢會較貴，但物有所值。」
感激未婚夫按摩
Amanda的未來老公Christian亦在背後十分支持，她說：「Christian好體貼，知道我為開舖忙，有時會幫我按摩紓壓，又會將會焗嘅麪包帶返公司畀同事試食，每個人都好鍾意，令我好安慰，佢公司喺ifc，所以朝早同lunchtime會落舖頭探吓我，同之前蔡瀾因為拍過飲食節目而認識，嗰時成日去唔同餐廳試食，令我燃起開餅店嘅passion，蔡瀾都有畀好多意見我。」
事事追求完美的Amanda除了去法國學最正宗的造餅技巧之外，還向日本取經，她說：「我去咗幾次日本做research，主要參考當地嘅包裝、裝修等，香港餅店嘅餅盒設計單調，我哋啲設計會比較colorful。」
夢幻餅店求開心
Amanda的餅店裝修與傳統的餅店有很大分別，以colorful為主，400呎的店舖雖然的骰，但五臟俱全，牆身設計以彩色為主題，粉紅、灰、黃、粉藍營造dreamy夢幻感覺，櫃面和地下鋪了灰白色的雲石，Amanda說：「我想顧客有一個開心嘅體驗，因為唔只係買一個普通麪包咁簡單，想顧客feelgood，餅盒嘅設計都花咗好多心思，例如三角形嘅餅盒設計概念來自日本．茶包嘅形狀都互相呼應。」
親自招呼顧客
問到生意如何，Amanda說：「生意都唔錯，雖然未正式開幕，男男女女都有，我都會親自招呼，想知有乜嘢地方可以做得更加好，8月4日opening我媽咪會喺台灣飛嚟香港支持。」
目標：家政女王
8歲已經整甜品給爸爸吃的Amanda，整餅的passion由細已經培養，她說：「細個都係玩煮飯仔嘅玩具，媽咪煮飯叻，但唔識整甜品，而爸爸鍾意食dessert，所以我就學整，之前去法國藍帶廚藝學院學整蛋糕，又去過法國著名嘅Laduree實習，學識咗好多嘢，除咗蛋糕、曲奇餅、果撻外，餅店亦會賣homemade果醬，下個月開始有法式三文治同咖啡賣。」
Amanda的夢想在30歲已一一實現，下一步將會是甚麼大計？她說：「我冇諗過做女強人，我想做一個goodhousewife，生BB，婚後可以為老公準備晚餐，我想效法美國家政女王斯圖爾特（MarthaStewart）和英國女廚神勞森（NigellaLawson），佢哋兩個係我偶像，冇諗過將來要開好多分店，做得好最多會開兩、三間分店，因為想keep住水準。」
