亨泰（197）唔夠1年，股價插水超五成，又係時候。亨泰股價不濟，部份原因，可能同集團2011年半年度純利，只係輕微增長1%至1.08億元有關。但集團正在拓展農業項目，農場初期建設成本及推廣活動會令開支增加。權當集團因為上述原因，2011年度（6月底止）純利無增長，維持2.27億元，全面攤薄PE不過11倍。而隨住農業上、中、下游三瓣業務全部到位，中線肯定繼原有多元消費品分銷業務外，支持集團高增長嘅另一壇大茶飯。亨泰2012年度純利係咁易上番20%增長，到2.7億元，PE落番9.5倍單位數，玩內銷或者農業概念，呢個PE夠晒吸引。買亨泰，博上番1字頭，回報率33%，2012年度PE不過12倍多少少。
NAV折讓五成吼德祥
德祥地產（199）最新NAV4.2元，現價（1.91元）嘅NAV折讓，高達55%，澳門相關股份中，德祥地產折讓，又係好吸引。集團透過聯生（揸住35.5%）參與澳門御南峰住宅項目，當中，第1、2期總銷售額過百億元，隨住項目落成入賬，德祥地產肥仔水。呢轉先嚟短打，冷吼博升30%到2.47元，德祥地產未有耐上到NAV。
錢雋