寶馬派錢　真諮詢送Options

香港社會最珍貴的，就是有選舉權、選擇權，凡事都可以自己揸主意，就算車行賣車都一樣要聽從民意，已推出一段時間的BMW523iASaloonExecutive，最近在原先的基礎上加入不少既實用又符合車主們要求的Options，要做到聽從民意喎！

記者：蕭漢祥
攝影：陳陶鈞
Model：Monnie@StarzPeople

寶馬派七萬

說選舉權就有點嚴肅，但在商業社會買家有得Say，呢啲叫做市場導向，同樣在車壇都唔例外。過往幾年銷量不俗的BMW523iA，為免原地踏步，最近就順應民意……呀唔係，係順應車主意願，將原本定位為較保守、中高檔的5系，半賣半送加入三大Options，讓這架房車更完美。

天窗　醒你$32,200

對於上世紀的汽車，設有天窗絕對是奢侈品，打開天窗就好似開篷車一樣，開揚的天空感覺高人一截。不過時至今日，擁有天窗幾乎是每輛車的必要環節，以523iA的市場定位，無理由唔追貼市場需要。雖然道理上唔可以算係追加Options，因為天窗並不是由無加裝到有，而係同一價錢就讓你擁有架有天窗的523iA，計落都算係變相送你一個大天窗。可能有人會認為送一個天窗唔算好着數，但大家要知道每一個Option背後其實都有售價，這大天窗原價$32,200，係咪即時覺得抵買咗呢！

■最多車主想擁有有天窗的座駕，難怪寶馬順應民意送畀你，原價都值三萬幾蚊o架。

八速自動波連加減撥片　醒你$32,000

以這台204匹馬力的房車，給予車主的駕駛樂趣毋庸置疑。但這次加推的加減撥片，據司機哥哥透露這一代的更為好用，因為清晰地右手加、左手減，比上一代每一邊都有加減更易用。再者，配合Steptronic八速自動波箱，以及DynamicDrivingControl的三種設定，即Normal、Sport及Sport+，使操控更加得心應手。

■5系設有三個不同行駛模式，配合加減波撥片，操控更富娛樂性。

後波鏡頭　減收$9,500

後波鏡頭是真正的後加設備，到拍攝當日的測試車還未安裝好，不少存貨還正在趕工中。老實說，其實寶馬本身的前後泊車感應已好夠用，能夠不規則地感應車前後約5呎距離的物件。不過安全措施無人會嫌多，後波鏡頭透過原廠的iDrive7吋屏幕顯示車後情況，即使車尾俾人整蠱放雜物都睇得一清二楚。優惠提供以$2,500讓車主換購總值$12,000的後波鏡頭，變相兩折出售，抵喇卦！

■新車主更可以兩折加裝原廠後波鏡頭，即使最怕泊車的女司機，泊車都十拿九穩。

配備多的中檔車系

其實回顧BMW的產品，每隔一段時間就將平時需要加錢的Options，轉變為車廂必備項目，就以今次的523iA為例，早已加裝了7吋iDrive系統，汽車狀態及行車資料一目了然。另外，以前下下都要加錢先有的Bi-Xenon頭燈，家咪又成為BMW車頭的Icon，還有無匙啟動汽車系統，啱晒一些對車的敏感度低、成日唔知自己撻咗車未的朋友，一切計計埋埋真是同級車中花款最多之一。

民意調查

究竟除天窗、加減撥片及後波鏡頭之外，廣大市民還有甚麼訴求，我哋當然要做個真正的諮詢。

換靚軨

最吸引的Options當然係換靚胎軨同加裝大包圍，出到街收視率都高啲。