前晚有一隻香水品牌喺中環搞咗個香水代言人選拔賽，搵咗車婉婉、甄穎珊同黃榕師妹Naomi做評判。準備做訪問嘅時候，忽然殺出喺附近出席完活動嘅「E奶紅姑」鄧伊玲（阿旦），有指佢話自己係評判之一，記者即圍埋同佢傾偈，佢話自己嘅寫真主要賣樣，仲話：「咪扮多啲鍾楚紅囉。」
「擺明博宣傳」
不過事後評判之一嘅Naomi就好嬲咁打電話畀記者，直言E奶紅姑喺度抽水博宣傳，佢聲音有啲嗚咽咁話：「覺得自己唔受尊重，問過公關話佢唔係評判，你話係嘉賓埋嚟影張相冇問題，你咁做擺明博宣傳。」佢補充話：「記者喺現場同唔同我做訪問冇所謂，唔受人尊重就唔得，阿旦擺明訪問同影相。」Naomi話都明白出寫真好需要宣傳，自己同黃榕都出咗本寫真，但唔應該無所不用其極去做喎！
阿旦噚日接受電話訪問時話冇同人講過自己係評判，佢話：「有朋友負責production，做完活動咪過去打招呼，唔介意俾人話，呢排出寫真有多啲宣傳係好事。」