所謂鑑聽級音樂享受，除咗對硬件有一定要求，軟件亦同樣重要！多年來，發燒友視SACD為樂曲寶典，然而近期新制式不斷興起，早已經被取代。好似由日本人親自監督兼負責生產嘅HQCD，就係現時音樂界嘅最高品質。今次，結合賣價達22萬港元嘅KEFBlade，同台「演奏」，品嚐演唱會樂曲，恍如現場聽Live。
記者：陳國輝
攝影：王文忠
Model：Fiona@ZModel
高級鑑聽房體驗
身處五百幾呎嘅KEF高級鑑聽房，除感受到地方寬敞，仲有呢套價值22萬港元嘅ConceptBlade喇叭。雖未細聽，但佢獨特嘅1.6米高刀形音箱，設計夠晒另類，睇見個Look，話唔定音樂發燒友已經開始中毒。
Blade的最大特色，係採用單點全頻技術，意思係能夠將所有聲源集中一點，令你唔輕易察覺到單元之間嘅分頻運作；而且，佢喺音箱左右兩邊，仲分別內置四個9吋低音單元，例如當處理爆炸性音源嗰陣，可有效減低低頻產生嘅強烈震動，更接近原音效果。
Profile
箱體設計：三音路反射式；單點全頻技術
驅動單元：中音（125mm）、高音（25mm）、低音（4×225mm）
頻率響應：40Hz-35kHz
分頻點：350Hz,2.3kHz
擴大器需求：50-400W
靈感度：91dB
輸出功率：117dB
重量：57.2kg
尺寸：1,590×363×540mm
標準顏色：白、黑
查詢：KEF（24222308）
近期發燒碟推介
HQCD
HQCD分三種：最高品質為日本監控兼生產嘅HQCD，不過成本最貴，售價約$180；第二類HQCD會多個「LPCDM2」標籤，香港監控，由日本負責壓碟，售價約$160；最便宜係由內地監控和壓製嘅HQCD，約售$100。
AQCD
由內地生產，由於成本低，售價與普通CD沒分別。碟底採用紫銀合金材料，除咗讀得比較準，密度也較一般CD為高。音色表現上，特點係純和寧靜，最適合聽Jazz或中樂。
LPCDM2
由本地發燒錄音師易有伍或KentPoon製作，為保持質素，每次只壓製1,000張，成本較高，約售$170。音色表現方面，LPCDM2特點係清爽，演繹古典以及人聲最好，也適合製作爆炸性音樂。
日本壓製HQCD最靚
發燒碟評人DavidLee，今次介紹幾種現時最流行嘅CD制式，當中以日本製作嘅HQCD（亦即HiQualityCD）為發燒友至愛。「原因係全程由日本錄音大師親自監督，製作非常嚴格。而且經母帶製成嘅每一個模具，每次只會壓製1,000張，確保唔會因複製數量太多，而導致音色出現任何耗損。」另外，由日本製作嘅HQCD，當地仲提供三種不同風格嘅Sample俾唱片公司選擇，勁專業。
David再解釋，由日本製作嘅HQCD，無論動態、平衡度，甚至細緻度方面，比起一般CD都優勝好多。就以試聽蘇永康隻《SOISING08LIVE》為例，普通CD聽落去就好似平面咁，但播放HQCD的話就變成一個立體，現場感非常逼真。
國產AQCD適合聽Jazz
既然HQCD屬於「量產型」，想必有炒賣情況。「印象最深係趙學而嗰隻《聽聽》，由於佢係全亞洲第一隻日本壓製嘅HQCD，當時曾經由大概$180炒至$800，足足炒高達四倍多！」DavidLee話，除咗音色最靚係佢，發燒友仲可選擇由香港人自己監製，印有「LPCDM2」標籤嘅HQCD，由於成本較低，所以呢類碟價錢約莫平一成。
近年，國內亦有份參與壓製高品質嘅音樂CD。例如國產HQCD，其特點係成本低，售價便宜（約日製HQCD的六折），不過壓製數量沒有限制，變相質素其實無乜保證。另外，內地仲推出咗AQCD（AnalogQualityCD）制式，售價同一般CD幾乎無分別，但由於碟底用紫銀合金材料，所以密度好高，雜音相對較少，目標是重現黑膠唱片的音質。DavidLee話，AQCD較適合聽純音樂或偏向寧靜嘅音樂，例如Jazz或者中樂之類都唔錯。
