拉利單車$130,000　電子轉波一身輕

高級品味生活的世界，男士所好又豈止幾百萬車價的超跑，高品質單車已成為新目標。數萬元一部單車已是身份象徵？未算！Colnago跟Ferrari攜手打造的CFXX限量單車，售價高達12,500歐元，約13萬港元。CFXX雖無拉利的極速，但地位肯定就如拉利馬仔般一躍龍門。

記者：許維雅
攝影：陳陶鈞
Model：Betrys@GME

全球限量50台

■只有7公斤車重的CFXX，女生一樣可以單手托起。

13萬元呢個數目可能好多人都負擔得起，但要用來買一部單車，就未必人人捨得。車主係法拉利迷亦係單車迷，一見到法拉利官方網頁公佈推出全球限量50架FerrariCFXX單車，二話不說決定買來用作收藏，佢覺得呢個價錢一啲都唔貴，「平日買架單車返嚟左改右改都分分鐘過十萬蚊，以CFXX所跟嘅配備嚟計，的確抵玩！」咁又係，仲要有埋法拉利個馬仔嘜頭，感覺又抵啲，加埋全球限量50架的矜貴程度，感覺更加抵！

■全黑車身黃色字，經典意大利結合的冷酷藝術品。

全碳纖打造7公斤車重

XX於法拉利車系中向來代表專為賽道而設計的最尖端技術，由Colnago跟Ferrari攜手打造的限量單車，名字亦加上XX，因3PRS車架線條設計及全碳纖物料打造的理念，亦借鑑了F1賽車的技術和精神。除車架，連頭叉及座椅等配件均以碳纖物料製造，配合Fulcrum刀軨，全車只重7公斤，唔只睇得，有碳纖、有刀軨、有電子轉波，一樣踩得，貫徹法拉利的速度精神。

用電轉波夠巴閉

呢部CFXX最巴閉地方，首推Dura-AceDi2電子變速器，靠電轉波，有別普通單車須靠威吔扯動轉波，輕輕一按便可轉波，容易輕鬆得多，反應亦更敏銳，連車主都話係最吸引的地方。