招行（3968）早前又向股東伸手攞錢，宣佈再透過A+H股供股，集資唔少過350億人仔。家乜嘢環境先得o架，內銀股前景又俾人睇淡，好多人都唔想再科水供股。
向股神批股免供股抽水
不過，招行水緊，揸住隻股嘅散戶都冇運行，所以有位機構投資者就諗到，搵股神畢菲特幫手，接咗批招行股份，反正股神咁睇好中國未來經濟發展。
呢位咁有諗頭嘅投資者叫崔軍，係陝西創贏投資董事長，內地媒體《每日經濟新聞》引述佢喺微博嘅發言，崔軍向招行董事長傅育寧發咗封公開信陳情，反對供股，建議招行不如向畢菲特招手，以定向增發方式配售新股。
佢仲計埋條數，話如果招行以每股約18.5港元，向股神批23億股H股，就湊夠350億呢個數嘞。
崔軍話，華爾街個個都睇淡，只係畢菲特發表睇好中國未來經濟發展嘅意見，仲話已經準備好行動，「正等待合適機會投資中國及印度市場」，如果招行肯同股神聯繫吓，相信對方一定有興趣。
不過，即使股神畢菲特對投資內地市場有興趣，都唔代表佢會揀內銀股，就算係揀銀行，亦都唔一定揀招行。呢位董事嘅聯想力，未免豐富咗啲。
李華華
mailto:[email protected]