葉振棠會喺九展搞兩場演唱會，噚日佢喺港台受訪時話：「到時會唱英文、國語同廣東話歌，仲會翻唱梅艷芳嘅《抱緊眼前人》。」棠哥話好欣賞梅姐嘅歌聲同工作態度：「今次唱佢首歌，最初擔心fans唔鍾意，早排將首歌放上網，反應好好。」另外，棠哥今次開騷會用另一個形象同fans見面，唔會金光閃閃，反而平實啲，會似外國音樂會。