佘詩曼、羅仲謙同蔡穎恩（Evelyn）等前晚去咗尖沙嘴，慶祝主演電影《人約離婚後》上映六日有3百萬票房，謙仔話如果票房過千萬，會說服女演員着泳衣遊船河，但阿佘就叫謙仔晒佢嘅42吋巨胸，仲笑住話自己嘅22吋小蠻腰同謙仔有得揮，阿佘又好有自信話滿意自己身形，亦可以着三點式：「睇到時先，我怕曬，最好有dresscode，連啲記者都着三點式。我都有八至十年冇公開着三點式，但就冇諗過拍寫真，家咁多青春少艾。」
Evelyn冷對分手
同場嘅Evelyn同樂隊Mr.成員Tom分手，有指Tom同Evelyn好友「陽光妹」何思諺（Leanne）撻着，提到被好友撬牆腳，Evelyn句句有骨，問佢會唔會問吓Leanne？佢話：「呢啲係佢哋私人事，知道都唔方便講，何況我乜都唔知，問番佢哋啦。」
至於件事有冇影響姊妹感情，Evelyn就話：「不如問吓會唔會影響我同Tom嘅關係，佢同任何人一齊都冇所謂。」Evelyn坦言同Leanne好耐冇見，又強調之前同台灣男模和本地插畫家小克嘅緋聞都係流料。