04年港姐冠軍徐子珊，早前被傳交上富豪，越住越富貴。之前強調自己只是租住貝沙灣的她，日前被踢爆講大話，原來去年已晉升成為千萬豪宅業主，她昨日出席活動解釋是其母付款，她靠拍劇和接內地騷供樓。
徐子珊昨日到尖沙嘴出席「無重力．夏水禮」活動，並示範飄浮攝影，不過穿上5吋高踭鞋的她不敢跳得太高。日前有指徐子珊去年已成為貝沙灣千二萬豪宅業主，收入來源備受質疑，更傳她受富豪照顧，她昨日主動向記者解釋並說：「今次係一場誤會，我之前真係租，不過後來業主要賣盤被迫遷。媽咪見我幾年要搬一次，所以就決定買，我就幫手供，所以我唔可以話層樓係我嘅，不過我都好多謝雜誌幫我宣傳。」
「靠自己做業主」
徐子珊又指今年因為拍劇及內地騷的收入不錯，更慶幸自己有能力供樓，她沒有為報道而感到不快。徐子珊透露去年8月已晉升業主，她續說：「我一直都想靠自己做業主，但啲樓價真係太貴，家我最希望可以買番層樓畀屋企人住。」
此外，徐子珊指將軍澳裕明苑居屋娘家多數是父親在港時入住，她說：「爸爸要返內地工作，返嚟就會住將軍澳。媽咪就跟住家姐喺台灣住，要照顧姨甥女。」最後徐子珊強調今次事件最令她不開心的是母親被騷擾，她表示：「媽咪嗰日湊住姨甥女，突然有人衝出嚟影相，下次問回應直接搵我。」
採訪：馬建華 攝影：黃文偉