圈中興起追仔熱，應采兒近期都停工休息，專心和老公陳小春造人。她昨日在中環出席活動，透露為配合老公，會效法吳君如「送外賣」方法，移船就磡，親自去搵老公造人。自封野蠻太太的應采兒，笑言在家中是女王，懷孕後會管實老公。
應采兒、熊黛林、劉心悠、恒生新抱何蓓倩、翻版關之琳Jocelyn等，昨日在中環出席Furla手袋活動，熊黛林黑色背心中門大開，最為搶鏡，她說：「OK啦，夏天應該sexy啲，可以再sexy啲都得，我好鍾意游水，成日喺屋企樓下泳池游，都係着比堅尼，我唔介意大家見到我。」
仔女不拘
問可有和郭富城一齊游？熊黛林說：「我多數同女仔一齊。」城城早前賽車，因壞車故障退出，熊黛林都為愛郎大感可惜。
應采兒剛和陳小春去了西班牙十多天旅行充電，心情暢快說：「好多人叫我兩個去，三個返，不過我呢期唔鍾意小朋友，唔知係咪懷孕前恐懼症。」
應采兒指老公心急生仔多時，但之前大家沒時間：「未有時間又冇乜行動，咁我惟有停咗自己啲嘢，我飛過去佢度，一個月出現幾日咁。」吳君如之前為生仔，笑言要「送外賣」去老公開工的片場所在，應采兒笑着點頭說：「最緊要唔好畀壓力自己，家係順其自然嘅不自然。」她笑言仔女沒所謂，皆因縱使女兒不夠靚，將來也可以整容。
自認野蠻
自言有睇中醫調理身體的應采兒，現時會停工休息，直到懷孕為止，她說：「家有衝動，咁等老公賺錢囉，我家喺屋企已經係女王，鍾意點就點，我有埋BB，佢死梗，小春都話驚，我到時管佢多啲。」她更開心自封野蠻太太。
採訪：LoMui
攝影：RickyIp