開P狂歡預埋拉姑四哥
馮仁昭四圍超：栢芝借Lucas生日與霆鋒團圓 - 馮仁昭

張栢芝同謝霆鋒關係仲處於冰封狀態，離婚似事在必行，但有傳栢芝數度拒簽霆鋒準備嘅離婚協議書。近日留喺內地拍攝《河東獅吼2》嘅栢芝，似乎仲想力挽狂瀾救婚姻。

好友Rick代發聲

噚日栢芝嘅髮型師好友RickChin喺中環出席新城活動，佢爆栢芝正忙於搞大仔Lucas下月2日嘅4歲生日會，栢芝一早同劇組請咗幾日假返香港同個仔慶生辰。咁到時係咪栢芝同霆鋒分開幫Lucas慶祝，一人玩半場？Rick話：「栢芝梗係想一齊搞啦，小朋友生日梗係想開心，唔會匿埋搞，會大搞。」
Rick話不單止老竇霆鋒，仲會請埋爺爺嫲嫲一齊嚟，家搵緊地方開派對呀。雖然之前栢芝公開數臭霆鋒，但照Rick咁講，栢芝都想同謝家人好好咁為Lucas慶祝生日，呢個會唔會係佢哋冰釋前嫌嘅大好機會？
Rick之前都喺微博指摘過霆鋒，但佢噚日話冇聽聞栢芝唔肯簽離婚書，仲話：「我梗係想佢哋好番，但佢（栢芝）心意未必係我諗法，好多嘢唔一定係咁嘅。」Rick仲話Lucas家上緊暑假playgroup，下月中就開始正式返學喇。

片場黑面耍大牌

栢芝日前喺象山拍戲，大熱天時着住長袖戲服，心情都唔多好。原本栢芝同男主角小沈陽拍談情戲時，仲有講有笑，不過當佢知道有記者在場，態度即180度大轉變，即時黑面，被當地傳媒形容為耍大牌。
小沈陽似乎都俾栢芝影響，喺片場時經常皺眉，加上栢芝面色唔好，小沈陽即時回復真面目，叉起手向助手指指點點。