名人富豪放暑期紛紛外遊，賭王四房長女何超盈早前跟媽咪和男友等一齊往歐洲，她昨日自爆在土耳其坐氫氣球遇上大風，一度不能返回地上，着陸時全部人跌到瞓地，她更撞傷膊頭，坦言怕怕，返港後更被賭王取笑。
英皇珠寶昨日在中環推出新系列，由張堅庭妻子楊諾思設計、以搖搖作靈感的年輕首飾，楊諾思找來甚少曝光的弟弟、楊受成幼子楊政龍（Alex）做模特兒試戴，廣告片則由自己的17歲兒子張高銘任導演操刀。一班年輕富二代、富三代，包括賭王四房長女何超盈、林建名兒子林孝信等都出席捧場。
男友攬實傷膊頭
何超盈透露剛和男友、弟妹陪媽咪一齊歐遊，更遇上驚險事件，她說：「我哋去希臘、土耳其玩，喺土耳其坐氫氣球，因為太大風，升咗上去落唔到嚟，落地時全部人都跌到瞓晒喺地下。」她不停呼籲記者不要去玩，更表示是最後一次玩，永遠不會再試。問到有否嚇到喊？超盈說：「冇，撞親個膊頭，男友都喺度，佢都有攬實我，大家都好驚。」她謂有將事件和賭王分享，更被賭王笑：「佢話一早叫咗我唔好坐。」
至於三房長女何超雲一樣歐遊多月，與男友陳山聰齊齊失蹤，超雲不時在微博晒旅行玩樂相，但就神神秘秘沒透露所在地。她昨日下午6時多，在微博上載一張機場相，更寫住「ByeLondon.Iwillbeback」，透露離開倫敦，超盈就表示歐遊期間沒見過家姐超雲，她說：「歐洲咁大！」
楊政龍自嘲冇用
楊受成幼子楊政龍少見傳媒，昨日在現場表現怕羞，更不肯獨自拍照，楊諾思指他現時在公司旗下工作，楊政龍則說：「喺公司做二打六，乜雜務要幫手咪做乜囉，之前有三個樓盤開，咪幫手驗樓、睇交樓，呢排北京有珠寶展，咪做珠寶囉，我都係啱啱畢業返嚟。」他修讀商科，回港兩年：「我都冇乜價值。」
採訪、攝影：LoMui