《戰國BASARA》憑型男索女歷史人物造型俘虜唔少機友心，出game出玩具都相當受歡迎。而PSP《GundamVS》系列隨時隨地對戰，放飯蛇王搭緊車都可以和同事朋友玩番兩手，中毒性夠深。以《GundamVS》系統為基本嘅《戰國BASARA年代群雄》，今集加埋華麗空中戰，應該可以幫機迷同PSP同度剩低唔多嘅日子，邊玩邊等PSVita出呀！
文：阿洛
組隊二打二
《戰國BASARA年代群雄》是09年4月推出嘅《戰國BASARA熱戰英雄》續集，繼續參考《GundamVS》系列操作方法及玩法，卻換上《戰國BASARA》人物，承襲二對二組隊對戰玩法，而且支援最多四人無線通信進行對戰。它繼承上集《戰國BASARA熱戰英雄》嘅save，一開機就打打打，玩法簡單畫面又唔差，繼續成為燃燒時間嘅妙品。
空中防衞加反彈
同上集最唔同之處，就係今集將空中戰鬥作為重點，戰鬥系統都得以強化，武將們嘅空中動作更加豐富。好似上集一啲無空中遠攻技嘅武將，今集都可以喺空中施展空對空或空對地嘅攻擊，同時亦增加空中防衞動作，面對地對空攻擊唔使硬食，系統大躍進。另外，亦有空中反彈技巧，喺命中對手攻擊剎那間進行防衞，就可以閘住再反彈對手嘅攻擊！
自閉地統一天下
今集全數有32名登場武將，收錄由《戰國BASARA》到《戰國BASARA3》嘅大量著名場面，新手一game在手就可以了解《戰國BASARA》整個故事架構。至於無乜朋友又被同學、同事排斥嘅機迷唔使怕，玩二抽二時可將其他角色改為電腦操控外，新增「天下統一戰記」模式，以統一天下為目標，操作武將不停打敗唔同地方敵人擴張領土同勢力，開機不求人。
《戰國BASARA年代群雄》
主機：PSP
製作廠商：Capcom
類型：動作
人數：1-4人
