「好嘅開始係成功嘅一半」，呢句說話雖然老土，不過都幾有道理；利物浦上周六作客友賽英冠嘅侯城，有2,000萬鎊（約2.5億港元）加盟嘅達寧「地標戰」（Debut），竟然吞咗3蛋，領隊杜格利殊會唔會怪佢黑腳呢？
謝老四養緊傷季初缺陣
公平啲嚟講，紅軍呢場友賽，除咗達寧之外，門將當尼同中場佐敦軒達臣都係地標戰，不過因為達寧身價較高，大家都將目光放喺呢位前維拉左翼身上。達寧半場休息後入替，當時紅軍已經落後緊0:2，不過佢上場只踢咗3分鐘就有破蛋機會，不過射門就畀侯城門將巴素救出；主隊由前鋒積森遜埋齋，就贈呢支英超兵3隻光蛋。達寧對於失機都仲好唔開心：「我以為自己有一個完美地標戰，但就畀巴素破壞；戰果係失望，但因為我哋仲未夠fit啫。」杜帥都為戰果辯護：「我哋由亞洲返嚟只操過一課，要畀多啲時間球隊。」
新兵疑似黑腳，舊人都唔係旺好多；因為養傷已經冇參加亞洲之旅嘅隊長謝拉特，腹股溝傷未好得晒，《每日鏡報》指，英超季初頭幾場比賽，都唔使預佢，甚至9月6日代表英格蘭對威爾斯嘅世盃外圍賽，亦極大機會缺陣。
新廠兵入30幾碼老烏
紅軍新兵黑，兵工廠嘅新兵就好似幾旺；轉會費平達寧一半嘅前鋒謝雲奴，地標戰友賽科隆就梅開二度，幫球隊贏2:1；呢場波法比加斯同拿斯尼當然冇份，睇阿仙奴嘅前線，謝雲奴、查馬克同禾確特，威力都唔少。不過有入波命嘅，唔單止係謝雲奴，新加盟嘅後衞贊堅臣，就有個離門近30碼嘅奇怪老烏，笠死咗隊友施捷斯尼，幫科隆破蛋；阿仙奴後防呢幾年都烏龍百出，今季多埋贊堅臣，睇怕激多領隊雲格幾錢重。