八級Casio　水戰半粒鐘

又嚟到玩水嘅季節，玩到忘形，一個唔小心跌咗部手機落水嘅噩夢，相信唔少人都試過！市面上防水電話選擇真係唔多，就算有，外形又可能唔多靚。如果講到要真係潛得落水玩，就更加少之又少。呢部Casio出品嘅日系新機CA-01C，睇外形同普通摺機無分別，但實際上佢嘅「潛力」同「攝力」都真係唔弱o架！

記者：韓繼聰
攝影：王文忠
Model：Christe

IPX8防水　潛力優厚

售價：$4,780

咪睇CA-01C個款靚靚仔仔，又無乜保護，就以為佢無「潛力」，其實玄機在於機身所有插位、入水位，全部設有防水膠邊，啲水想入去都難！CA-01C講明達到IPX8防水級別，即係話，可以在正常水溫下，深入1.5米水深，操作30分鐘。實測試過，浸水玩足半粒鐘都全無問題，無呃你！之但係又唔代表咩水都落得喎，落海、浸溫泉、冲梘液都唔得，你想攞佢去沙灘玩，一樣ByeBye玩完。都係乖乖哋留喺泳池同靚女玩水算喇！

■microSD、充電、HDMI及電池位都設有防水膠。

■每次開機都會提醒你要注意的防水位置。

千六萬像　攝力超強

其實Casio出相機都好有經驗，嚟到手機自然會將呢個優勢完全移植！千六萬像CMOS鏡頭，比唔少相機更強勁。它的基本相機設定完全有齊，白平衡、曝光補償、連拍等，完全自主，絕對唔係儍瓜級數！水上影相時，色彩鮮明、成像銳利，完全達到相機級數；落埋水底，攝力依然不減，即使用自動模式，亦沒有出現偏色、變形嘅現象，不愧為一部為水而生嘅手機。雖然佢得一隻大眼，但一樣可以跟住指示，橫移鏡頭影兩張相，咁就影到裸視3D相，效果唔錯o架！再加埋FullHD拍片，拍靚女玩水最啱！特別一提，呢部日系機唔使解鎖，香港SIM卡一插即用，夠晒方便！