今年9月將再任媽咪嘅徐淑敏（Suki），距離預產期尚餘一個多月，佢樂得輕鬆安胎，今年5月身懷5個月身孕仲將個肚收收埋埋，被指體形過瘦，老公黃浩（Kenny）錫到燶，早前連續帶佢去印尼同蘇梅島旅行充電，成功谷肥老婆，令佢喺一個月內增加10磅，Suki噚日接受電話訪問時話：「因為當地天氣太熱，我陀住BB行幾步就叫攰，唔去得好遠，試勻酒店裏邊嘅餐廳。」
狂進修當胎教
素顏Suki仲同老公大玩自拍，兩公婆不停勁食，Suki為降溫仲大啖食雪糕，佢仲話想趁生女前，同老公二人世界去轉北海道，佢話：「我都未同老公去過呢度，好掛住北海道嘅美食，最想可以去埋shopping。」
安胎期間，Suki仲進修增值，聘請私人老師返屋企學習不同語言、繪畫、彈豎琴同唱歌，高峯期學足10樣嘢，佢話：「我當係胎教，不過呢排懶咗，cut淨三、四樣。」Suki話囡囡Vianna好接受即將有妹妹出世陪佢玩，仲話：「Vianna仲會錫我個肚皮㖭。」