講七一遊行人數係六萬，而唔係二十二萬，原來會俾人鬧，此日飲茶，立即俾餐飲M抦，佢話自己當日在維園球場，自己靠估都估到有十五萬人啦。左丁山答辯話：「我只係引用獨立第三者數字，比較吓邊種方法點人頭較為可信啫，你信民陣講嘅二十二萬，我信鍾庭耀講嘅六萬，應該各不相干。」鍾庭耀是否可信，大家決定可也，不過在政黨民望調查，特首局長民望調查，政府滿意度調查方面，好似冇人質疑過港大民意調查計劃喎？鍾庭耀話特首民望插水，大家信到十足，但鍾庭耀話遊行人數得六萬，就話佢不足信，點解呀？
飲茶完畢，落到皇后大道，碰到肥仔N，富商也，笑佢：「幾乎俾你個大肚腩撞親！」肥仔N話：「唓，我嘅血壓係120/80，一定健康過你！」左丁山為之愕然，四五十歲嘅肥仔N，有冇咁近乎完美嘅血壓呀？肥仔N騎騎笑，「我朝早食三粒藥丸，臨上床又吞兩粒，降血壓、降膽固醇、降血糖，每三個月驗一次血，醫生話我一切正常，你都要學我咁勤力啪丸呀！食藥係好有效嘅！」成世都要食呢，一旦放棄食藥，啲指標就會爆燈，有乜好？
肥仔N講：「信吓科技，信吓醫生啦，我有好多朋友食丸食得更犀利，每日早午晚加埋，吞二三十粒丸閒閒地。」喂，唔好亂嚟噃，吞得多有冇副作用？肥仔N話：「唔駛驚，有一位老闆到巴黎驗身，見過一位法國醫生/健康專家，經詳細檢驗之後，嗰位法國專家叫佢每日食乜乜，食物物，絕大部份係維他命、保健丸，一日二三十粒，老闆食咗一個月，感覺非常良好，驗血發現一切指標正常，於是介紹俾朋友，如此口頭傳播之下，法國醫生啲生意多到接唔切，為每位客戶訂下保健計劃，每年收費十零萬唧，後來佢見到太多中國人到巴黎，索性移磡就船，每季嚟香港、上海、北京巡迴演出。我地華人發咗財，法國名牌大大得益，呢位法國醫生已經成為保健名牌咯！」唔，陶傑話巴黎樣樣都好，法國人可能話華人啲錢最好！