有翻版蒙嘉慧之稱的模特兒朱瑜（JoyeZ.），四年前由上海來港工作，這幾年行過不少大騷，身經百戰，近年察覺香港女模競爭加大，又多了一批o靚模敗壞風氣，Joye現正努力增值，為未來轉行鋪路。
模特兒公司StarzPeople捧紅了MaggieQ，更紅到在荷李活拍電影和電視劇，同樣屬旗下的朱瑜，接受過專業模特兒訓練，並擁有178cm標準身高，故深受各大牌子喜愛，入行四年行過不少大騷，包括Chanel、Dior、Gucci和Valentino等。問Joye是否希望朝着MaggieQ的目標進發，一舉成名？她說：「如果有機會我都想去美國行騷，不過我冇咁大野心，希望做好自己先。」
愛電影想拍戲
來自上海的Joye是個標準電影迷，小時曾立志做演員，不過卻當上女模，她說：「中學畢業後，老師覺得我身高同條件都非常符合做模特兒，於是提議我入讀模特兒專科訓練學校，2005年仲提名我參加北京嘅模特兒公司比賽，獲全國第三。」
2006年尾Joye機緣巧合下在上海認識了StarzPeople的booker，並問她有否興趣來港工作，於是她一個人由上海來到香港追尋夢想：「四年並唔係短時間，剛嚟香港時，十個人有九個話我似蒙嘉慧，不過自己就唔覺得，但有一次搭車經過戶外廣告板，以為自己係廣告中嘅主角蒙嘉慧，不過都有人話我似年輕時嘅林青霞同鍾楚紅。」
Joye來港工作後，也到過日本發展，她說：「當時只簽短合約，印象最深係一落機就去Hermèscasting，嗰次喺日本行咗好多騷，最欣賞日本人認真工作態度。本來今年諗過再去日本行騷，不過3月日本發生大地震，所以會押後計劃。」
入行搵大公司
來港四年的Joye察覺香港的模特兒界轉變很大，她說：「四年前好多機會，早前又有金融海嘯，加上前兩年開始多內地model嚟香港，競爭大咗，又出現o靚模風氣，啲女仔過份賣弄身材，搞到風氣好差。之前有新聞話有人藉模特兒公司之名非禮年輕模特兒，之後好多女仔話畀佢非禮過，好似博宣傳，女仔應該要有少少矜持，如果真係想入行做model，應該搵大公司，上網check清楚，唔好輕易俾人呃。」
讀會計搞生意
模特兒並非長久工作，Joye已為將來鋪路，她說：「平日工作之外，都有為自己增值，學英文、會計，希望將來可以做吓小生意，就算結婚都唔想淨係做全職主婦，希望有自己事業。」
自言小時是男仔頭，不玩洋娃娃，Joye說：「我細個唔鍾意玩公仔，反而鍾意玩槍，四處跑，到中學仲係留短頭髮，而且我生得高，所以有寒背，有次我話畀朋友知我會去做模特兒，佢哋仲笑我邊有寒背model，之後好努力挺直行，先至入到圍。」
行山排毒
平日工作遊走石屎森林的朱瑜，閒時最愛行山：「我鍾意去西貢、石澳行山，沿途睇風景、睇樹木，感覺好relax，行完山出一身汗，可以排去身體嘅毒素，皮膚都會靚啲，呢個係最天然嘅美容心得。」
Joye又謂做模特兒除了喼弗之外，皮膚都要保持得好，她說：「護膚一定唔可以偷懶，我差唔多日日keep住做mask，另外一定要食早餐，早餐前應該飲杯暖水，可以清理腸胃，瞓咗一晚都要補充足夠水份。另外，嚟咗香港學識廣東養顏湯水，拿手煲木瓜花生雞腳湯，雞腳含有豐富骨膠原，對皮膚好好，木瓜就好補。」
朱瑜Profile
英文名：JoyeZhu
出生：上海
年齡：25
身高：178cm
三圍：32、24、35
行騷經驗：
Chanel、Dior、Gucci、Kenzo、ShanghaiTang、香港時裝節，日本則曾行過Hermés和Valentino等。
採訪：JessicaNgan
攝影：EdwardChou
化妝：SynniTamofPrivatei
髮型：Xenter
服裝提供：ckCalvinKlein