【香港書展2011之死敵相爭】不倒胸何佩瑜（Jeana）和露暈許穎（Phoebe）連日書展鬥個你死我活，罵戰連場，出位谷銷量。Phoebe曾指寫真集賣性交感覺，她昨日凌晨捽碟後即自爆被胸襲，Jeana不同情更譏諷這是預期效果。
何佩瑜和許穎日日隔空開火，Phoebe昨日凌晨谷胸在銅鑼灣酒吧捽碟，吸引異性瘋狂擸影，一度大混亂，她自稱有男fans乘機博懵胸襲，Phoebe捽碟後在微博吐苦水說：「剛才DJ工作發生了一件很不愉快的事，給非禮了..希望大家明白性感是我工作需要，但也請專（尊）重別人..專（尊）重自己。」
「掂到應該係男仔」
Phoebe昨日繼續倒D奶到書展造勢，還向女fans送上穿過的泳衣，問到非禮事件，她說：「噚晚現場好多人同我握手同合照，我唔覺意舉高手時，發現俾人掂到我個胸，我feel到佢特登，伸手過嚟有男有女，掂到嗰個應該係男仔。」為何不即時大叫和報警？她說：「咁佢又唔係揸落嚟，嗰時好快，睇唔到邊個。」
對於Jeana早前在無綫節目中玩擲骰時不慎露點，Phoebe揶揄說：「冇人想喺電視睇到露點。」對於Jeana死口不認，Phoebe說：「有醜事發生，正常反應係唔認。我唔夠佢勁，宣傳都玩露點。」其實Phoebe寫真都有疑似露暈和露毛，與Jeana不相伯仲。而Jeana露點片段在無綫網站tvb.com點擊飆升，累積逾38萬，更是綜藝娛樂節目首位。
Jeana稱身價逾萬
死敵Jeana對Phoebe的遭遇毫不同情，她昨日說：「佢宣傳本書都講到性交呢啲敏感字眼，發生呢啲嘢咪佢達到目的囉。」有讀者報料指Jeana曾坐枱，出街價是一萬元，她說：「邊個話坐過我枱，又話有相證明嘅，約埋出嚟睇相，我哋一齊飲茶敍舊，講到同我咁熟，出嚟要幫襯買本寫真，我簽名之餘送埋唇印又點話。我梗係唔止一萬蚊，我係父母嘅無價寶。」
此外，今年休戰的周秀娜近日接受內地傳媒訪問，揶揄近日博上位o靚模說：「她們拍的寫真缺乏了新意，可以試試倒吊着吃雪糕。」
採訪：何慧斯、溫敏芝、比華利
攝影：黃偉雄、陳志嵐