【第2屆籃球超級聯賽】隨着Duncan惠龍兒一記大力鋤樽，為一連4日的籃球超級聯賽拉下帷幕。今季3度屈居永倫成為「3亞王」的南華，邀來兩名前NBA球員蘭特及夏里遜助拳，昨於灣仔修頓室內場上演的超聯決賽，終修成正果，以85:83險勝衞冕的福建封王，兼奪6萬港元獎金！記者：鄧永賢、林湛穎 攝影：陳亮華
由甲一「Big4」合演的超聯，連日來也幾近逼爆可容納1,900人的修頓；據籃總主席陳瑞添表示，今年氣氛比去年首辦更為高漲，來年或增加參賽隊數增加刺激性，目前為止更有兩支球隊率先表態有意參加。
羅意庭攻入28分
回說賽事，過去3場初賽為南華合共轟入過百分的前NBA紐約人前鋒蘭特，今仗面對有同樣在NBA打滾多年、兼去屆MVP布福坐鎮的福建，火力雖減，但憑着效力CBA福建潯興回巢助拳的羅意庭「着火」全場攻入28分，當中包括命中完第一節最後一擊超遠的3分波，半場僅以41:49落後入更衣室。
但力圖衞冕的福建，易邊後突然跌watt，被南華羅意庭、蘭特及夏里遜的「三叉戟」乘勢反擊，並以67:61反超前結束第3節。福建最終雖有賽後榮膺最有價值球員的科華斯攻入全場最高的30分，惜難敵南華「羅蘭組合」共轟入的56分，卒以兩分飲恨。領獎時開心得跳舞的阿庭，賽後坦言開心︰「好滿意今仗表現，與陣中兩名外援也有不俗的化學作用，令對手難以防守，可以抱住開心的心情返福建。」
洪游奕喜見球員進步
南華班主洪游奕賽後亦表現興奮，直言每名球員將獲5位數字額外獎金︰「球隊整季都好努力，最開心見到『占士』陳翊麟、周健宏等一班年輕球員進步，今次從安青借來的幾位小將林凱光、蔡熾洪及連浩駿，來季也會加盟南華；我們亦好有信心，一早訂了酒店食飯慶祝。」他又大讚兩名外援有專業精神，「夏里遜右腳有傷，靠打針夾硬上陣，好專業，而他們表現好也帶起隊波，如果他們來年有時間，定會找他們助拳。」因在更衣室療傷而錯過頒獎禮的夏里遜，賽後笑言自己今次因傷僅得「一隻腳」比賽，下次回來有「兩隻腳」定必贏得更輕易。本報訊
《花絮》
夏葛夫半場轟9球3分
籃球超聯最引人入勝之處，莫過於睇吓幾支球隊搵返嚟嘅外援有幾勁。今屆賽事8個外援當中，雖以飛鷹陣中嘅前鋒夏葛夫（右）最冇來頭，但冇名氣唔代表渣；佢噚日場季軍戰，單喺上半場就轟入9個3分波，造就佢成為3分神射手之一，只可惜未能帶領球隊爭勝，終以76:82不敵永倫得第4。
鍾仔講籃球一樣掂
3色台噚日為超聯作現場直播，主持組合除咗講開NBA嘅翁金驊（右）同靚女拍檔李靄璣（左）外，隔籬仲有位大家都熟識嘅足球評述員鍾志光（中）。鍾仔平時講開足球，原來講籃球都有板有眼，見到場內一班老友黃興桂等仲忍唔住嗌出嚟㖭。
男拔校隊執5,000蚊
呢幾日超聯都有個中場射波遊戲，由現場觀眾角逐由賽事籌委會主席陳少煌（左）送出嘅1萬蚊獎金。可惜一直冇人射得中，陳生就決定賣大包改為射3分大賽，得到全場掌聲鼓勵嘅伯伯就贏唔到，最終由男拔萃校隊嘅蘇尚瀛（右）同另一位陳生（中），同樣3射中2，各得5,000元獎金。
